രഹസ്യ വിവരത്തിന്‍റെ അടിസ്ഥാനത്തില്‍ പരിശോധന; പൊലീസ് സേനയിൽ നിന്ന് പുറത്താക്കിയ ആൾ എംഡിഎംഎയുമായി പിടിയിൽ

കഞ്ചാവ് കടത്തിയതിന് പൊലീസ് സേനയിൽ നിന്ന് പുറത്താക്കപ്പെട്ട കരുനാഗപ്പള്ളി സ്വദേശി ബക്കറിനെ എക്സൈസ് സംഘം വീണ്ടും അറസ്റ്റ് ചെയ്തു. ഇയാളുടെ വീട്ടിൽ നടത്തിയ പരിശോധനയിൽ എംഡിഎംഎയും കഞ്ചാവും പിടികൂടി. രഹസ്യ വിവരത്തിന്റെ അടിസ്ഥാനത്തിലായിരുന്നു എക്സൈസിന്റെ നടപടി.

കൊല്ലം: കൊല്ലത്ത് പൊലീസ് സേനയിൽ നിന്ന് പുറത്താക്കിയ ആൾ എംഡിഎംഎയുമായി എക്സൈസിന്റെ പിടിയിൽ. കരുനാഗപ്പള്ളി ആദിനാട് സ്വദേശി ബക്കർ ആണ് പിടിയിലായത്. ഇയാളുടെ വീട്ടിൽ നിന്നും 2.186 ഗ്രാം എംഡിഎംഎയും 21 ഗ്രാം കഞ്ചാവും കൊല്ലം എക്സൈസ് സ്ക്വാഡ് പിടികൂടി. പൊലീസിൽ ഡ്രൈവറായി ജോലി ചെയ്തു വരവെയാണ് 26 കിലോ കഞ്ചാവ് കടത്തിയ കേസിൽ പ്രതിയായി ഇയാൾ ജോലിയിൽ നിന്ന് പുറത്താക്കപ്പെടുന്നത്.

കൊല്ലം എക്സൈസ് സ്ക്വാഡ് ഇൻസ്പെക്ടർ സാജന്റെ നേതൃത്വത്തിലുള്ള സംഘമാണ് പ്രതിയെ പിടികൂടിയത്. ജോലിയിൽ നിന്ന് പുറത്തായ ശേഷവും ഇയാൾ പല സ്ഥലങ്ങളിൽ ഒളിവിൽ താമസിച്ച് മയക്കുമരുന്ന് വ്യാപാരം നടത്തി വരികയായിരുന്നു. അടുത്ത കാലത്തായി സ്വന്തം നാട്ടിൽ തന്നെ കേന്ദ്രീകരിച്ച് വ്യാപാരം നടത്തുന്നതായി രഹസ്യ വിവരം ലഭിച്ചതിനെ തുടർന്ന് ഇയാൾ എക്സൈസിന്റെ നിരീക്ഷണത്തിലായിരുന്നു. പരിശോധനകൾക്ക് കരുനാഗപ്പള്ളി സി.ഐ ഷാജി നേതൃത്വം നൽകി. സ്ക്വാഡ് പാർട്ടിയിൽ പ്രിവന്റീവ് ഓഫീസർമാരായ ജ്യോതി, സജീവ്, പ്രിവന്റീവ് ഓഫീസർ ഗ്രേഡ് ഗംഗ ബി, സുനിൽ ജോസ്, സിവിൽ എക്സൈസ് ഓഫീസർമാരായ സാലിം,അനന്തു എസ്, ജയകുമാർ എന്നിവർ പങ്കെടുത്തു. പ്രതിക്കെതിരെ എൻഡിപിഎസ് നിയമപ്രകാരം കേസെടുത്ത് അന്വേഷണം ആരംഭിച്ചു.