ഭാര്യവീടിനടുത്ത് ലഹരിവിൽപ്പനയ്ക്ക് ശ്രമം, ക്രിമിനൽ കേസുകളിൽ പ്രതി എംഡിഎംഎയുമായി പിടിയിൽ

തിരുവനന്തപുരത്ത് 1.27 ഗ്രാം എംഡിഎംഎയുമായി നിരവധി ക്രിമിനൽ കേസുകളിലെ പ്രതിയായ ജോയൽ തോമസ് പിടിയിലായി. ആറ്റിങ്ങൽ ഡിവൈഎസ്പിക്ക് ലഭിച്ച രഹസ്യവിവരത്തെ തുടർന്ന് ഡാൻസാഫ് ടീമാണ് ഇയാളെ പിടികൂടിയത്. പ്രതിയെ കോടതിയിൽ ഹാജരാക്കി റിമാൻഡ് ചെയ്തു.

തിരുവനന്തപുരം: ലഹരി വിൽപ്പന നടത്തിയിരുന്ന നിരവധി ക്രമിനൽകേസുകളിലെ പ്രതി അറസ്റ്റിൽ. 1.27 ഗ്രാം എംഡിഎംഎയുമായി തൃശൂർ ഇരിഞ്ഞാലക്കുട സ്വദേശി ജോയൽ തോമസ് (28) ആണ് തലസ്ഥാനത്ത് നിന്നും അറസ്റ്റിലായത്. ആറ്റിങ്ങൽ ഡിവൈഎസ്പിക്ക് ലഭിച്ച രഹസ്യവിവരത്തിന്‍റെ അടിസ്ഥാനത്തിൽ, ഡാൻസാഫ് ടീം നടത്തിയ നീക്കത്തിനൊടുവിലാണ് പ്രതി പിടിയിലായത്. കീഴായിക്കോണത്തുള്ള ഭാര്യവീടിന് സമീപത്തുനിന്നാണ് ഡാൻസാഫ് ടീം ഇയാളെ പിടികൂടിയതെന്ന് പൊലീസ് പറഞ്ഞു. തുടർനടപടികൾക്കായി പ്രതിയെ വെഞ്ഞാറമൂട് പൊലീസിന് കൈമാറി. വെഞ്ഞാറമൂട് പൊലീസ് നടത്തിയ വിശദമായ അന്വേഷണത്തിലാണ് ഇ‍യാൾ നിരവധി കേസുകളിൽ പ്രതിയാണെന്ന് കണ്ടെത്തിയത്. തൃശൂർ ജില്ലയിലെ രണ്ട് പൊലീസ് സ്റ്റേഷനുകളിൽ രാസലഹരിയുമായി ബന്ധപ്പെട്ട കേസുകളും, മറ്റ് വിവിധ സ്റ്റേഷനുകളിലായി അക്രമ സംഭവങ്ങൾ ഉൾപ്പെടെ നാലോളം കേസുകളും ഇയാളുടെ പേരിലുണ്ടെന്ന് പൊലീസ് കണ്ടെത്തി. കോടതിയിൽ ഹാജരാക്കിയ ഇയാളെ റിമാൻഡ് ചെയ്തു.