തലസ്ഥാനത്തെ ഗവ. കണ്ണാശുപത്രിയിൽ മെഗാ ക്ലീനിംഗ് ഡ്രൈവ് സെപ്തംബര്‍ 30ന്; മേയർ ഉദ്ഘാടനം ചെയ്യും, പാമ്പുകളെ പിടിക്കാൻ വാവ സുരേഷ്

തിരുവനന്തപുരം ഗവ. കണ്ണാശുപത്രി വളപ്പിൽ സെപ്തംബർ 30ന് നഗരസഭയുടെ നേതൃത്വത്തിൽ മെഗാ ക്ലീനിംഗ് ഡ്രൈവ് സംഘടിപ്പിക്കുന്നു. കാടും പടർപ്പും മാലിന്യങ്ങളും നിറഞ്ഞ് ഇഴജന്തുക്കളുടെ ശല്യമായതിനാലാണ് അടിയന്തര ശുചീകരണം നടത്തുന്നത്. മേയർ വി. വി. രാജേഷ് ഉദ്ഘാടനം ചെയ്യുന്ന യജ്ഞത്തിൽ പാമ്പുകളെ പിടിക്കാൻ വാവ സുരേഷും പങ്കെടുക്കും.

തിരുവനന്തപുരം: തലസ്ഥാനത്തെ പ്രമുഖ നേത്ര ചികിത്സാ കേന്ദ്രമായ തിരുവനന്തപുരം ഗവ. കണ്ണാശുപത്രി വളപ്പിൽ സെപ്തംബർ 30ന് മെഗാ ക്ലീനിംഗ് ഡ്രൈവ് സംഘടിപ്പിക്കുന്നു. തിരുവനന്തപുരം നഗരസഭയുടെ നേതൃത്വത്തിലാണ് ശുചീകരണ യജ്ഞം നടക്കുന്നത്. ആശുപത്രിയിലെ ആറ് ഏക്കറോളം വരുന്ന കോമ്പൗണ്ട് നിലവിൽ കാടും പടർപ്പും മാലിന്യക്കൂനകളും നിറഞ്ഞ് കിടക്കുന്ന അവസ്ഥയിലാണ്. ഇത് ഇഴജന്തുക്കളുടെ വിഹാരകേന്ദ്രമായി മാറിയിട്ടുണ്ടെന്ന് മാത്രമല്ല, പകർച്ചവ്യാധി ഭീഷണിയുയർത്തി ആശുപത്രിയിലെത്തുന്ന രോഗികൾക്കും ജീവനക്കാർക്കും സമീപവാസികൾക്കും ഒരുപോലെ ബുദ്ധിമുട്ട് സൃഷ്ടിക്കുന്നുമുണ്ട്. ഈ സാഹചര്യത്തിലാണ് അടിയന്തര ശുചീകരണത്തിന് നഗരസഭ മുന്നിട്ടിറങ്ങിയിരിക്കുന്നത്.

ഉദ്ഘാടനം

രാവിലെ 8 മണിക്ക് തിരുവനന്തപുരം മേയർ വി. വി. രാജേഷ് ശുചീകരണ യജ്ഞം ഉദ്ഘാടനം ചെയ്യും. ടൗൺ പ്ലാനിംഗ് കമ്മിറ്റി ചെയർമാൻ പാറ്റൂർ രാധാകൃഷ്ണൻ ചടങ്ങിൽ അദ്ധ്യക്ഷത വഹിക്കും. ഡെപ്യൂട്ടി മേയർ ജി. എസ്. ആശാനാഥ്, ഹെൽത്ത് സ്റ്റാൻഡിംഗ് കമ്മിറ്റി ചെയർമാൻ എം. ആർ. ഗോപൻ, ആശുപത്രി ഡയറക്ടർ ഡോ. ചിത്ര, സൂപ്രണ്ട് ഡോ. സുനിൽ എം.എസ്, ആർ. എം. ഒ ഡോ. നയന എന്നിവർ ചടങ്ങിൽ സംബന്ധിക്കും. ആശുപത്രി വളപ്പിൽ ഇഴജന്തുക്കളുടെ ശല്യമുള്ളതിനാൽ പാമ്പുകളെ പിടികൂടുന്നതിനായി സ്നേക്ക് മാസ്റ്റർ വാവ സുരേഷും ശുചീകരണ യജ്ഞത്തിന്റെ ഭാഗമാകും.