കോൺ​ഗ്രസുകാർക്ക് ഇപ്പോൾ തന്നോട് സ്നേഹമാണെന്ന് എംഎം മണി, ഉടുമ്പൻചോലയിൽ മണിയായിരുന്നെങ്കിൽ ജയിച്ചേനെയെന്ന് കമന്റ്

ഫേസ്ബുക്ക് കമന്റിന് പിന്നാലെ കോൺഗ്രസുകാർക്ക് തന്നോട് ഇപ്പോൾ സ്നേഹമാണെന്ന് എംഎം മണി പരിഹസിച്ചു. ഉടുമ്പൻചോലയിൽ താൻ കൊണ്ടുവന്ന വികസനം കോൺഗ്രസ് അംഗീകരിച്ചതിൽ സന്തോഷമുണ്ടെന്നും, നിലവിലെ എൽഡിഎഫ് സ്ഥാനാർത്ഥി ജയചന്ദ്രന് തനിക്ക് ലഭിച്ചതിനേക്കാൾ വലിയ ഭൂരിപക്ഷം നൽകണമെന്നും അദ്ദേഹം അഭ്യർത്ഥിച്ചു.

തിരുവനന്തപുരം: കോൺ​ഗ്രസുകാർക്ക് ഇപ്പോൾ തന്നോട് സ്നേഹമാണെന്ന പരിഹാസവുമായി സിപിഎം നേതാവ് എംഎം മണി. ജയിലിൽ അടച്ചപ്പോഴും 9 മാസം ജില്ലയിൽ പ്രവേശനം നിഷേധിച്ചപ്പോഴും കാണാത്ത സ്നേഹമാണ് കാണുന്നതെന്നും ഇടുക്കി ജില്ലയിലെ പൊതുശല്യത്തെ ജില്ലയിൽ നിന്നും ഒഴിവാക്കി എന്നാണ് അന്നത്തെ ആഭ്യന്തര മന്ത്രി നിയമസഭയിൽ പ്രസംഗിച്ചതെന്നും മണി ഫേസ്ബുക്കിൽ കുറിച്ചു. ഉടുമ്പൻചോല മണ്ഡലം കേരളത്തിൽ ഏറ്റവും കൂടുതൽ വികസനം കൈവരിച്ച മണ്ഡലങ്ങളിൽ ഒന്നാണ് എന്ന് കോൺഗ്രസ് സമ്മതിച്ചത് തന്നെ വലിയ കാര്യമാണെന്നും അദ്ദേഹം പറഞ്ഞു. വികസനം എൽഡിഎഫിന് വോട്ടായി മാറണം. 

ജയചന്ദ്രനെ നിർത്തിയത് മികച്ച ഭൂരിപക്ഷത്തിൽ ജയിക്കാനായി തന്നെയാണ്. നിങ്ങൾ 2021 ൽ എനിക്ക് നൽകിയ 38 ,305 ൽ അധികം ഭൂരിപക്ഷം ജയചന്ദ്രന് നൽകണം. 193 ബൂത്തിൽ 192 ബുത്തിൽ എനിക്ക് നിങ്ങൾ ലീഡ് നൽകി അനുഗ്രഹിച്ചു. ഇത്തവണ 193 ബുത്തിലും ലീഡ് നൽകി ജയചന്ദ്രനെ വൻഭൂരിപക്ഷത്തിൽ വിജയിപ്പിച്ച് നമ്മുടെ മണ്ഡലത്തിന്റെ വികസന സ്വപ്നങ്ങൾ പൂർത്തീകരിക്കുന്നതിന് ആവശ്യമായ സഹായം എല്ലാവരിൽ നിന്നും ഉണ്ടാകണമെന്ന് അഭ്യർത്ഥിക്കുന്നുവെന്നും അദ്ദേഹം കുറിച്ചു. എംഎം മണി സ്ഥാനാർഥിയായിരുന്നെങ്കിൽ ഉടുമ്പൻചോലയിൽ എൽഡിഎഫ് ജയിച്ചേനേയെന്ന് ഫേസ്ബുക്കിൽ ഒരാൾ കമന്റിട്ടതിന് പിന്നാലെയാണ് എംഎം മണിയുടെ പരിഹാസം.