കൊച്ചിയിൽ വീണ്ടും ഓപ്പറേഷൻ തൂഫാൻ: ഒഡിഷ സ്വദേശിയെ കഞ്ചാവുമായി ഡാൻസാഫ് സംഘം പിടികൂടി

'ഓപ്പറേഷൻ തൂഫാൻ നാർക്കോ ഹണ്ടിന്റെ' ഭാഗമായി കൊച്ചിയിൽ പോലീസ് നടത്തിയ പരിശോധനയിൽ ഒഡീഷ സ്വദേശി പിടിയിലായി. കലൂർ സ്റ്റേഡിയത്തിന് സമീപത്തുനിന്നും 1.956 കിലോഗ്രാം കഞ്ചാവുമായി സൗമ്യ പ്രകാശ് നായക് എന്നയാളാണ് അറസ്റ്റിലായത്. ഇയാൾ വൻ ലഹരിമരുന്ന് സംഘത്തിലെ പ്രധാന കണ്ണിയാണെന്ന് പോലീസ് സംശയിക്കുന്നു.

കൊച്ചി: നഗരത്തിൽ ലഹരിമരുന്ന് സംഘങ്ങൾക്കെതിരെ പോലീസിന്റെ പരിശോധന ശക്തമായി തുടരുന്നു. സംസ്ഥാനത്ത് പൊലീസ് നടത്തുന്ന 'ഓപ്പറേഷൻ തൂഫാൻ നാർക്കോ ഹണ്ട്' പരിശോധനകളുടെ ഭാഗമായി ഒഡീഷ സ്വദേശിയെ വൻ കഞ്ചാവ് ശേഖരവുമായി സിറ്റി പോലീസ് പിടികൂടി. ഒഡീഷ ഗജപതി സ്വദേശിയായ സൗമ്യ പ്രകാശ് നായക് (26) ആണ് കൊച്ചി സിറ്റി ഡാൻസാഫ് ടീമിന്റെ പിടിയിലായത്.

കലൂർ അന്താരാഷ്ട്ര സ്റ്റേഡിയത്തിന് സമീപത്തുനിന്നാണ് ഇയാളെ പോലീസിന്റെ പ്രത്യേക സംഘം തടഞ്ഞുവെച്ച് പരിശോധിച്ചത്. പ്രതിയുടെ പക്കലുണ്ടായിരുന്ന 1.956 കിലോഗ്രാം കഞ്ചാവ് പൊലീസ് പിടിച്ചെടുത്തു. കൊച്ചി സിറ്റി പോലീസ് കമ്മീഷണർ കാളിരാജ് മഹേഷ് കുമാറിന് ലഭിച്ച രഹസ്യവിവരത്തിന്റെ അടിസ്ഥാനത്തിലായിരുന്നു മിന്നൽ പരിശോധന. നാർക്കോട്ടിക് സെൽ അസിസ്റ്റന്റ് കമ്മീഷണർ ടി ഡി സുനിൽകുമാറിന്റെ നേതൃത്വത്തിലുള്ള കൊച്ചി സിറ്റി ഡാൻസാഫ് ടീമാണ് പ്രതിയെ വലയിലാക്കിയത്. മറ്റ് സംസ്ഥാനങ്ങളിൽ നിന്ന് വൻതോതിൽ ലഹരിവസ്തുക്കൾ കൊച്ചിയിലേക്ക് എത്തിച്ച് വിൽപന നടത്തുന്ന സംഘങ്ങളിലെ പ്രധാന കണ്ണിയാണ് ഇയാളെന്ന് പോലീസ് സംശയിക്കുന്നു. കേസിൽ കൂടുതൽ അന്വേഷണം പുരോഗമിക്കുകയാണ്.