പഞ്ചായത്ത് പ്രസിഡന്‍റ് അപ്രതീക്ഷിതമായി രാജിവെച്ചു; യുഡിഎഫ് ഭരിക്കുന്ന പഞ്ചായത്തിൽ ഭരണ പ്രതിസന്ധി

പാലക്കാട് ചാലിശ്ശേരി പഞ്ചായത്തിലെ പ്രസിഡന്‍റ് ആണ് മെമ്പര്‍ സ്ഥാനം ഉള്‍പ്പെടെ രാജിവെച്ചത്.

പാലക്കാട്: പാലക്കാട് ചാലിശ്ശേരി പഞ്ചായത്ത് പ്രസിഡൻറ് രാജിവെച്ചു. കോൺഗ്രസിലെ എവി സന്ധ്യയാണ് രാജി വെച്ചത്. പഞ്ചായത്ത് പ്രസിഡന്‍റ് സ്ഥാനത്തിന് പുറമെ മെമ്പര്‍ സ്ഥാനവും ഇവര്‍ രാജിവെച്ചു. ഇതോടെ പഞ്ചായത്തിൽ ഭരണ പ്രതിസന്ധി നിലനില്‍ക്കുകയാണ്. യുഡിഎഫ് ഭരിക്കുന്ന പഞ്ചായത്തിൽ 15 സീറ്റിൽ 8 യുഡിഎഫ്, 7 എൽഡിഎഫ് എന്ന രീതിയിലാണ് കക്ഷി നില.

സന്ധ്യ മെമ്പ൪ സ്ഥാനവും രാജിവെച്ചതോടെയാണ് ഭരണ പ്രതിസന്ധി . കോൺഗ്രസിലെ തന്നെ മറ്റൊരംഗവുമായുള്ള അഭിപ്രായ വ്യത്യാസമാണ് രാജിയിൽ കലാശിച്ചത്. സന്ധ്യ മെമ്പര്‍ സ്ഥാനവും രാജിവെച്ചതോടെ ഇരു കക്ഷികള്‍ക്കും ഏഴു വീതം അംഗങ്ങളാണുള്ളത്. സന്ധ്യയുടെ രാജിയോടെ ഭരണം തന്നെ നഷ്ടമാകുമെന്ന പ്രതിസന്ധിയിലാണ് യുഡിഎഫ്.