കൊച്ചിയിലെ പെട്രോൾ പമ്പിലെത്തി 100 രൂപയ്ക്ക് പെട്രോൾ അടിച്ചു, പണം നൽകിയില്ല; ചോദ്യം ചെയ്തപ്പോൾ ക്രൂരമർദ്ദനം; പ്രതികൾക്കായി മട്ടാഞ്ചേരി പൊലീസ്

എറണാകുളം ചുള്ളിക്കലിലെ പെട്രോൾ പമ്പിൽ നൂറു രൂപയ്ക്ക് പെട്രോൾ അടിച്ച ശേഷം പണം ചോദിച്ചതിന് മാനേജർക്ക് നേരെ രണ്ടംഗസംഘം ആക്രമണം നടത്തി. സ്ഥിരം പ്രശ്നക്കാരായ പ്രതികൾക്കായി മട്ടാഞ്ചേരി പോലീസ് കേസെടുത്ത് അന്വേഷണം ആരംഭിച്ചു. സംഭവത്തിന് ശേഷം പ്രതികൾ ഒളിവിലാണ്.

കൊച്ചി: എറണാകുളം ചുള്ളിക്കലിലെ പെട്രോൾ പമ്പിലാണ് നൂറു രൂപയെ ചൊല്ലിയുള്ള തർക്കത്തെ തുടർന്ന് പമ്പ് മാനേജർക്ക് നേരെ ആക്രമണം ഉണ്ടായത്. പമ്പിലെത്തി നൂറു രൂപയ്ക്ക് പെട്രോൾ അടിച്ച ശേഷം പണം നൽകാതെ പോകാൻ ശ്രമിച്ച രണ്ടംഗസംഘത്തെ മാനേജർ തടഞ്ഞുനിർത്തുകയായിരുന്നു. തുടർന്ന് ഇവരിൽ നിന്ന് പണം ഈടാക്കിയതാണ് പ്രതികളെ പ്രകോപിപ്പിച്ചത്. പണം ചോദിച്ചതിന് പമ്പ് മാനേജറായ മട്ടാഞ്ചേരി സ്വദേശി വിഷ്ണു വിനോദിനെ ഈ രണ്ടംഗസംഘം ക്രൂരമായി മർദ്ദിക്കുകയായിരുന്നു.

ആക്രമണം നടത്തിയ ഈ സംഘം സ്ഥിരമായി പമ്പിലെത്തി പ്രശ്നങ്ങൾ ഉണ്ടാക്കാറുള്ളവരാണെന്ന് പെട്രോൾ പമ്പ് ഉടമ വ്യക്തമാക്കുന്നു. മർദ്ദനമേറ്റ ജീവനക്കാരനായ വിഷ്ണു വിനോദിന്റെ പരാതിയുടെ അടിസ്ഥാനത്തിൽ മട്ടാഞ്ചേരി പോലീസ് കേസ് രജിസ്റ്റർ ചെയ്തിട്ടുണ്ട്. ചുള്ളിക്കൽ സ്വദേശികളായ ഈ രണ്ടംഗസംഘത്തിന് പിന്നാലെയാണ് നിലവിൽ പോലീസ്. സംഭവത്തിന് ശേഷം ഒളിവിൽ പോയ പ്രതികളെ കണ്ടെത്തുന്നതിനായി മട്ടാഞ്ചേരി പോലീസ് അന്വേഷണം ശക്തമാക്കിയിട്ടുണ്ട്.