അട്ടപ്പാടിയിൽ രണ്ട് പേർ‌ക്ക് ഷോക്കേറ്റ് ദാരുണാന്ത്യം; പൈപ്പിലെ വയറിൽ നിന്ന് ഷോക്കേറ്റെന്ന് നി​ഗമനം

ഇന്നലെ രാത്രി പത്തരക്ക് ഇരുവരും പറമ്പിനോട് ചേർന്ന് വെള്ളം വരുന്ന പൈപ്പിൽ ചില അറ്റകുറ്റപ്പണികൾ നടത്തിയിരുന്നു

പാലക്കാട്: അട്ടപ്പാടിയിൽ രണ്ട് പേർ ഷോക്കേറ്റ് മരിച്ചു. മഞ്ചിക്കണ്ടി മാത്യു, ചെർപ്പുളശ്ശേരി സ്വദേശി  രാജു എന്നിവരാണ് മരിച്ചത്.  പുതൂർ പഞ്ചായത്തിലാണ് മഞ്ചിക്കണ്ടി. വീടിന്റെ പിന്നിലുള്ള ഭാ​ഗത്താണ് മരിച്ച നിലയിൽ കണ്ടെത്തിയത്. ഇന്നലെ രാത്രി പത്തരക്ക് ഇരുവരും പറമ്പിനോട് ചേർന്ന് വെള്ളം വരുന്ന പൈപ്പിൽ ചില അറ്റകുറ്റപ്പണികൾ നടത്തിയിരുന്നു. ഇതിനിടെ ഷോക്കേറ്റതാകാമെന്നാണ് നി​ഗമനം. ഇന്നലെ രാത്രി പത്തരവരെ ഇവർക്കൊപ്പം മറ്റ് സുഹൃത്തുക്കൾ ഉണ്ടായിരുന്നു. ഇതിന് ശേഷമാണ് ഇവർ അറ്റകുറ്റപ്പണികൾക്കായി പോയതെന്നാണ് കരുതുന്നത്. ഇന്ന് രാവിലെയാണ് ഇരുവരെയും മരിച്ച നിലയിൽ കണ്ടെത്തിയത്. അ​ഗളി പൊലീസ് സ്ഥലത്തെത്തി തുടർനടപടികൾ ഇപ്പോൾ സ്വീകരിച്ചു വരികയാണ്. പ്രാഥമികമായി മറ്റ് ​ദുരൂഹതകളൊന്നും സംഭവത്തിലില്ല എന്നാണ് അ​ഗളി ഡിവൈഎസ്പി അറിയിച്ചിരിക്കുന്നത്.