രാവിലെ കിണറിനടുത്ത് എത്തിയപ്പോൾ പാമ്പുകടിച്ചു, 75കാരിക്ക് ദാരുണാന്ത്യം

രാവിലെ വീടിന് സമീപത്തെ കിണറിനടുത്ത് വച്ചാണ് സുധർമ്മയെ പാമ്പ് കടിച്ചത്.

തിരുവനന്തപുരം: വീടിന് സമീപത്തെ കിണറ്റിൻകരയിൽ വെച്ച് പാമ്പ് കടിയേറ്റ് വയോധിക മരിച്ചു. കാരേറ്റ് പേടികുളം മേലതിൽ വീട്ടിൽ സുധർമ്മ (75) ആണ് മരിച്ചത്. രാവിലെ വീടിന് സമീപത്തെ കിണറിനടുത്ത് വച്ചാണ് സുധർമ്മയെ പാമ്പ് കടിച്ചത്. കുഴഞ്ഞ് വീണ ഇവരെ ഉടൻ തന്നെ ബന്ധുക്കളും അയൽവാസികളും ചേർന്ന് തിരുവനന്തപുരം മെഡിക്കൽ കോളേജ് ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. ആശുപത്രിയിലേക്കുള്ള യാത്രാമധ്യേ തന്നെ മരണം സംഭവിച്ചതായാണ് വിവരം. നിലവിൽ മൃതദേഹം മെഡിക്കൽ കോളേജ് ആശുപത്രി മോർച്ചറിയിൽ സൂക്ഷിച്ചിരിക്കുകയാണ്. പോസ്റ്റ്‌മോർട്ടം നടപടികൾക്ക് ശേഷം മൃതദേഹം ബന്ധുക്കൾക്ക് വിട്ടുനൽകും.