1000 രൂപയ്ക്ക് താഴെയുള്ള ബില്ലുകളും തടഞ്ഞു, കോട്ടുകാൽ പഞ്ചായത്ത് സെക്രട്ടറിയെ രാത്രിയിലും ഉപരോധിച്ച് ഭരണ സമിതി

ജനുവരി മാസം മുതലുള്ള ബില്ലുകൾ കുടിശ്ശികയാണെന്നും പാസാക്കാത്തത് മനപൂർവ്വമാണെന്നും പ്രസിഡന്‍റ് കെ ചന്ദ്രലേഖ

തിരുവനന്തപുരം: ബില്ലുകൾ തടഞ്ഞു വയ്ക്കുന്നു എന്നാരോപിച്ച് കോട്ടുകാൽ പഞ്ചായത്തിൽ സെക്രട്ടറിയെ ഭരണ സമിതി അംഗങ്ങൾ ഉപരോധിച്ചു. വൈകിട്ട് തുടങ്ങിയ ഉപരോധം രാത്രി 8.30 വരെ നീണ്ടു. കമ്മിറ്റിയിൽ ചായ സൽക്കാരം നടത്തിയതുൾപ്പെടെ 1000 രൂപയ്ക്ക് താഴെ വരുന്ന ബില്ലുകളുകൾ പോലും അനാവശ്യമായി തടഞ്ഞെന്ന് ചൂണ്ടിക്കാട്ടി എൽഡിഎഫ് ഭരണ സമിതിയിലെ അംഗങ്ങൾ ഉൾപ്പെടെ ഉപരോധിച്ചു.

ജനുവരി മാസം മുതലുള്ള ഇത്തരം ബില്ലുകൾ കുടിശ്ശികയാണെന്നും മനപ്പൂർവമാണ് ഇവ പാസാക്കാത്തതെന്നും പ്രസിഡന്‍റ് കെ ചന്ദ്രലേഖ പറഞ്ഞു. സംഭവമറിഞ്ഞു വിഴിഞ്ഞം പൊലീസ് എത്തി. എന്നാൽ പ്രശ്ന‌ം സാങ്കേതികമാണെന്നും മനപ്പൂർവമല്ലെന്നും ഒരാഴ്‌ചക്കുള്ളിൽ ബില്ലുകളെല്ലാം പാസാക്കുമെന്നും സെക്രട്ടറി പി വി ബിന്ദു വിശദീകരിച്ചു. സെക്രട്ടറിയുടെ വിശദീകരണത്തെ തുടർന്ന് പ്രതിഷേധക്കാർ സമരം അവസാനിപ്പിച്ചു.

ഏഷ്യാനെറ്റ് ന്യൂസ് ലൈവ് യൂട്യൂബിൽ കാണാം