രാത്രി വീട്ടിൽ കയറി യുവതിയുടേയും സുഹൃത്തിന്റേയും വീഡിയോ പകര്‍ത്തി ഭര്‍ത്താവിന് അയച്ചുകൊടുക്കുമെന്ന് ഭീഷണി, രണ്ടുപേര്‍ അറസ്റ്റിൽ

മഞ്ചേശ്വരത്ത് വീട്ടിൽ അതിക്രമിച്ച് കയറി യുവതിയുടെയും സുഹൃത്തിന്റെയും വീഡിയോ പകർത്തി ഭീഷണിപ്പെടുത്തിയ കേസിൽ രണ്ടുപേർ അറസ്റ്റിലായി. വീഡിയോ പ്രചരിപ്പിക്കുമെന്ന് ഭീഷണിപ്പെടുത്തി പണവും ഡയമണ്ട് കമ്മലും തട്ടിയെടുത്ത സംഘം, ലൈംഗികമായി വഴങ്ങാൻ ആവശ്യപ്പെട്ടതോടെയാണ് യുവതി പോലീസിൽ പരാതി നൽകിയത്.

കാസർകോട്: മഞ്ചേശ്വരത്ത് വീട്ടിൽ അതിക്രമിച്ച് കയറി യുവതിയുടെയും ആൺസുഹൃത്തിന്റെയും വീഡിയോ പകർത്തുകയും ലൈംഗിക ചൂഷണ ശ്രമം നടത്തുകയും ചെയ്തതിന് രണ്ടുപേർ പിടിയിൽ. ഉദ്യാവര സ്വദേശികളായ അൻവർ, സെനോഹർ എന്നിവരാണ് അറസ്റ്റിലായത്. രാത്രിയിൽ വീട്ടിൽ അതിക്രമിച്ചു കയറി യുവതിയുടെയും ആൺ സുഹൃത്തിൻ്റെയും വീഡിയോ ചിത്രീകരിക്കുകയായിരുന്നു. 23ന് രാത്രി പത്തര മണിയോടെയാണ് സംഭവം. മഞ്ചേശ്വരം പൊലീസ് സ്റ്റേഷൻ പരിധിയിൽ താമസിക്കുന്ന 27 വയസുകാരിയാണ് പരാതിക്കാരി. വീഡിയോ സാമൂഹിക മാധ്യമങ്ങൾ വഴി പ്രചരിപ്പിക്കുമെന്നും ഭർത്താവിനു അയച്ചുകൊടുക്കുമെന്നും ഭീഷണിപ്പെടുത്തി യുവതിയോട് പണം ആവശ്യപ്പെട്ടു, പണം ഇല്ലെന്നു പറഞ്ഞപ്പോൾ ഡയമണ്ട് കമ്മൽ ഭീഷണിപ്പെടുത്തി ഊരിവാങ്ങി.

തുടർന്നുള്ള ദിവസങ്ങളിലും പണം ആവശ്യപ്പെട്ട് ഭീഷണി തുടർന്നു. ലൈംഗികബന്ധത്തിന് വഴങ്ങണമെന്ന് ആവശ്യപ്പെട്ടതോടെ യുവതി പൊലീസിൽ പരാതി നൽകുകയായിരുന്നു. മഞ്ചേശ്വരം പൊലീസ് നടത്തിയ അന്വേഷണത്തിലാണ് ഉദ്യാവർ മാട സ്വദേശികളായ 46 വയസുകാരൻ അൻവർ, 28 വയസുള്ള സെനോഹർ എന്നിവർ അറസ്റ്റിലായത്. സെനോഹർ നേരത്തെ കഞ്ചാവ് കേസ് പ്രതിയാണ്.