Tiger Cub: ബത്തേരിയില് ജനവാസമേഖലയിലെ കുഴിയില് വീണ കടുവക്കുഞ്ഞിനെ രക്ഷിച്ചു; അമ്മക്കടുവയ്ക്കായി തെരച്ചില്
Synopsis
ഇന്ന് രാവിലെ എട്ട് മണിയോടെയാണ് ബീനാച്ചി എസ്റ്റേറ്റിന് സമീപമുള്ള ബത്തേരി മന്ദം കൊല്ലിയിലെ ജനവാസ മേഖലയിൽ ആറ് മാസം പ്രായമായ പെൺകടുവ അകപ്പെട്ടത്.
വയനാട്: വയനാട് ബത്തേരി മന്ദംകൊല്ലിയിലെ ജനവാസ മേഖലയിൽ ആഴമുള്ള കുഴിയിൽ ആറുമാസം പ്രായമായ പെൺകടുവ (Tiger Cub) അകപ്പെട്ടു. വനം വകുപ്പ് ഉദ്യോഗസ്ഥരെത്തി കടുവയെ മയക്കുവെടിവച്ച് രക്ഷിച്ചു. അമ്മ കടുവയെ കണ്ടെത്തി കടുവ കുഞ്ഞിനെ വനത്തിൽ തിരിച്ചുവിടാനുള്ള നടപടികൾ തുടങ്ങിയെന്ന് വനം വകുപ്പ് അറിയിച്ചു. ഇന്ന് രാവിലെ എട്ട് മണിയോടെയാണ് ബീനാച്ചി എസ്റ്റേറ്റിന് സമീപമുള്ള ബത്തേരി മന്ദം കൊല്ലിയിലെ ജനവാസ മേഖലയിൽ ആറ് മാസം പ്രായമായ പെൺകടുവ അകപ്പെട്ടത്. നാട്ടുകാർ വിവരമറിയിച്ചതിനെ തുടർന്ന് ഉന്നത വനം വകുപ്പ് സംഘം സ്ഥലത്ത് എത്തി. ചീഫ് വെറ്റിനറി സർജൻ അരുൺ സഖറിയയുടെ നേതൃത്വത്തില് കടുവയെ മയക്കുവെടി വച്ച് രക്ഷപ്പെടുത്തി.
ബത്തേരി ഫോറസ്റ്റ് സ്റ്റേഷനിലെത്തിച്ച് കടുവയ്ക്ക് പിന്നീട് ചികിത്സ നൽകി. കടുവയ്ക്ക് കാര്യമായ പരിക്കുകൾ ഇല്ലെന്ന് സൗത്ത് വയനാട് ഡിഎഫ്ഒ ഷജ്ന കരീം ഏഷ്യാനെറ്റ് ന്യൂസിനോട് പറഞ്ഞു. ആറ് മാസം പ്രായമായ പെൺകടുവയുടെ അമ്മ മന്ദംകൊല്ലിയിലെ വനമേഖലയിൽ തന്നെ ഉണ്ടാകുമെന്നാണ് വനം വകുപ്പിന്റെ നിഗമനം. അമ്മക്കടുവയെ കണ്ടെത്തി കടുവയെ കാട്ടിലേക്ക് തുറന്നു വിടാനാണ് തീരുമാനം. മന്ദംകൊല്ലിയിൽ ഒരു വർഷം മുൻപ് വളർത്തു മൃഗങ്ങളെ കൊന്ന കടുവയെ കൂട് വെച്ച് പിടികൂടിയിരുന്നു. വേനൽ കനത്തതോടെ കർണാടകയിലെ വനമേഖലയിൽ നിന്ന് വയനാട് വന്യജീവി സങ്കേതത്തിലേക്ക് കടുവകൾ കൂട്ടത്തോടെ എത്തുന്ന സമയമായതിനാൽ ജനങ്ങൾ ജാഗ്രത പാലിക്കണമെന്ന് വനം വകുപ്പ് ഉദ്യോഗസ്ഥർ അറിയിച്ചു.
-
മന്ത്രിമാരുടെ പേഴ്സണല് സ്റ്റാഫിന്റെ പെൻഷന്; സര്ക്കാര് ഖജനാവില് നിന്ന് ചോരുന്നത് വന്തുക
മന്ത്രിമാരുടെ പേഴ്സണല് സ്റ്റാഫിന്റെ പെൻഷനിലൂടെ (Pension) സര്ക്കാര് ഖജനാവില് നിന്ന് പ്രതിവര്ഷം ചോരുന്നത് വൻ തുകയാണ്. നാല് വര്ഷം പൂര്ത്തിയാകാതെ പേഴ്സണല് സ്റ്റാഫിന് പെൻഷൻ കൊടുക്കരുതെന്ന് പതിനൊന്നാം ശമ്പള കമ്മീഷൻ ശുപാര്ശ ചെയ്തെങ്കിലും സര്ക്കാര് അത് അംഗീകരിച്ചില്ല. പൂര്ണ്ണമായും രാഷ്ട്രീയത്തിന്റെ അടിസ്ഥാനത്തില് നിയമിക്കുന്ന പേഴ്സണല് സ്റ്റാഫിന് രണ്ട് വര്ഷം കഴിയുമ്പോള് തന്നെ മുഴുവൻ പെൻഷനും കിട്ടും
ഗവര്ണ്ണര് ശക്തമായി ഉന്നയിച്ച മന്ത്രിമാരുടെ പേഴ്സണല് സ്റ്റാഫിന്റെ പെൻഷൻ പ്രശ്നം മുൻപും കേരളത്തില് സജീവ ചര്ച്ചയായിരുന്നു. മന്ത്രിമാര്ക്ക് മാത്രമല്ല പ്രതിപക്ഷ നേതാവിന്റെ സ്റ്റാഫിനും സമാനമായി പെൻഷൻ കിട്ടും എന്നതിനാല് യുഡിഎഫും എല്ഡിഎഫും ഇക്കാര്യത്തില് പരസ്പരം പഴി ചാരാതെ മൗനം പാലിക്കും. ഇവര്ക്ക് യോഗ്യത പോലും പ്രശ്നമല്ല. സംസ്ഥാനത്ത് പേഴ്സണല് സ്റ്റാഫ് പെൻഷൻ വാങ്ങുന്ന 1223 പേര് ഉണ്ടെന്നാണ് കണക്ക്. രണ്ട് വര്ഷത്തിന് മേല് സര്വീസ് ഉള്ളവര്ക്ക് മിനിമം പെൻഷൻ 3550 രൂപായാണ്. സര്വീസും തസ്തികയും അനുസരിച്ച് പെൻഷൻ കൂടും 30 വര്ഷത്തിന് മേല് സര്വീസ് ഉള്ള പേഴ്സണല് സ്റ്റാഫുകള് പോലുമുണ്ട്. 2013 എപ്രിലിന് ശേഷം സര്ക്കാര് സര്വീസില് പ്രവേശിച്ച ജീവനക്കാര്ക്ക് പങ്കാളിത്ത പെൻഷനാണ്.
എന്നാല് പേഴ്സണല് സ്റ്റാഫിന് പങ്കാളിത്ത പെൻഷൻ പോലുമല്ല നല്കുന്നത്. രണ്ട് വര്ഷം കഴിയുമ്പോള് തന്നെ പേഴ്സണല് സ്റ്റാഫിനെ മാറ്റി അവര്ക്ക് പെൻഷൻ ഉറപ്പാക്കിയ ശേഷം വേറെ ആളുകളെ നിയമിച്ച് അവര്ക്കും പെൻഷൻ ഉറപ്പാക്കുന്ന രീതിയും സംസ്ഥാനത്തുണ്ട്. ഇതേക്കുറിച്ചും പതിനൊന്നാം ശമ്പള കമ്മീഷൻ ചൂണ്ടിക്കാണിച്ചു. നാല് വര്ഷത്തിന് മുകളില് സര്വീസുള്ള പേഴ്സണല് സ്റ്റാഫിനേ പെൻഷൻ കൊടുക്കാവൂവെന്ന് ശമ്പള കമ്മീഷൻ റിപ്പോര്ട്ട് സമര്പ്പിച്ചെങ്കിലും സര്ക്കാര് അത് അംഗീകരിക്കാതെ ഒഴിഞ്ഞു. ഇപ്പോള് ഈ വിഷയത്തില് ഗവര്ണ്ണര് ശക്തമായ നിലപാട് എടുത്ത സാഹചര്യത്തില് ഇനി സ്വന്തക്കാരെ നിയമിച്ച് അവര്ക്ക് പെൻഷൻ നല്കുന്ന രീതിയില് സര്ക്കാര് എന്തെങ്കിലും മാറ്റം വരുത്തുമോ എന്നാണ് അറിയേണ്ടത്.
കേരളത്തിലെ എല്ലാ Local News അറിയാൻ എപ്പോഴും ഏഷ്യാനെറ്റ് ന്യൂസ് വാർത്തകൾ. Malayalam News അപ്ഡേറ്റുകളും ആഴത്തിലുള്ള വിശകലനവും സമഗ്രമായ റിപ്പോർട്ടിംഗും — എല്ലാം ഒരൊറ്റ സ്ഥലത്ത്. ഏത് സമയത്തും, എവിടെയും വിശ്വസനീയമായ വാർത്തകൾ ലഭിക്കാൻ Asianet News Malayalam