ജിഎസ്ടി വകുപ്പിൽ അവസാനിക്കാത്ത പ്രമോഷൻ തർക്കം; നേരിട്ടുള്ള നിയമനം അനുപാതം തെറ്റിച്ചെന്ന് പരാതി

ജിഎസ്ടി വകുപ്പിൽ ഉദ്യോഗസ്ഥരുടെ പ്രമോഷനും നിയമനവുമായി ബന്ധപ്പെട്ട തർക്കങ്ങൾ രൂക്ഷമാകുന്നു. സ്റ്റേറ്റ് ടാക്സ് ഓഫീസർ തസ്തികയിലേക്കുള്ള നേരിട്ടുള്ള നിയമനങ്ങൾ സ്ഥാനക്കയറ്റം കാത്തിരിക്കുന്നവരുടെ അവസരങ്ങൾ ഇല്ലാതാക്കുന്നുവെന്ന് ഒരു വിഭാഗം ജീവനക്കാർ ആരോപിക്കുന്നു. വിഷയത്തിൽ സർക്കാർ വ്യക്തത വരുത്താത്തത് ജീവനക്കാർക്കിടയിൽ വലിയ അതൃപ്തിക്ക് കാരണമായിട്ടുണ്ട്.

കൊച്ചി: ജിഎസ്ടി വകുപ്പ് രൂപവത്കരിച്ച് വർഷങ്ങൾ കഴിഞ്ഞിട്ടും ഉദ്യോഗസ്ഥരുടെ പ്രമോഷനുമായി ബന്ധപ്പെട്ട തർക്കങ്ങൾക്ക് പരിഹാരമായിട്ടില്ല. വിഷയത്തിൽ പരാതികളും നിയമ നടപടികളും തുടരുമ്പോഴും സർക്കാർ നിലപാട് വ്യക്തമാക്കാത്തതിൽ ജീവനക്കാർക്കിടയിൽ അതൃപ്തി ഉയരുകയാണ്.

പഴയ സെയിൽസ് ടാക്സ് വകുപ്പ് ജിഎസ്ടി വകുപ്പായി മാറിയതോടെ മുൻകാലത്തെ പോലെ ജോലി ഭാരം ഇല്ലാതായെന്നാണ് ജീവനക്കാർ പറയുന്നത്. പുനഃക്രമീകരണം നടത്തുമെന്ന് സർക്കാർ അറിയിച്ചിരുന്നുവെങ്കിലും കാര്യമായ മാറ്റങ്ങൾ ഇതുവരെ നടപ്പായിട്ടില്ല. സ്റ്റേറ്റ് ടാക്സ് ഓഫീസർ (എസ്ടിഒ) തസ്തികയിലേക്കുള്ള നേരിട്ടുള്ള നിയമനങ്ങളാണ് ഇപ്പോഴത്തെ പ്രധാന തർക്ക വിഷയം. അനുപാതം പാലിക്കാതെയാണ് നിയമനം നടത്തുന്നതെന്നാണ് ഒരു വിഭാഗം ജീവനക്കാരുടെ പരാതി. ഇതുമൂലം സ്ഥാനക്കയറ്റം കാത്തിരിക്കുന്നവർക്ക് പ്രമോഷൻ അവസരം നഷ്ടപ്പെടുന്നുവെന്നും അവർ ആരോപിക്കുന്നു.

പി എസ് സി റാങ്ക് ലിസ്റ്റിലുള്ളവർ നിയമനം വേഗത്തിൽ നടത്തണമെന്ന ആവശ്യവുമായി രംഗത്തുണ്ടെങ്കിലും, നിലവിലെ നിയമന രീതി പ്രതിഷേധത്തിനിടയാക്കിയിട്ടുണ്ട്. നേരിട്ടുള്ള നിയമനത്തിലൂടെ എത്തിയവരും സ്ഥാനക്കയറ്റം ലഭിച്ചവരും രണ്ട് തട്ടിലായി നിൽക്കുന്ന സാഹചര്യമാണിപ്പോൾ. ജിഎസ്ടി വകുപ്പിലെ പല ജോലികളും താഴെത്തട്ടിലുള്ള ഉദ്യോഗസ്ഥരിലേക്ക് കൈമാറിയതോടെ ഡെപ്യൂട്ടി കമ്മിഷണർ ഉൾപ്പെടെയുള്ള ചില തസ്തികകളിൽ ജോലി ഭാരം കുറഞ്ഞ നിലയാണെന്നും പറയുന്നു. അധികമായി നിയമിതരായവർക്ക് ജോലികൾ നിശ്ചയിക്കാൻ പോലും ബുദ്ധിമുട്ടുണ്ടെന്നാണ് ജീവനക്കാരുടെ വാദം. അതേസമയം നിയമന-പ്രമോഷൻ വിഷയങ്ങളിൽ സർക്കാർ അടിയന്തരമായി വ്യക്തത വരുത്തണമെന്നും ക്രമം തെറ്റിച്ച നിയമനങ്ങൾ തടയണമെന്നും ഒരു വിഭാഗം ജീവനക്കാർ ആവശ്യപ്പെട്ടു.