കരിഞ്ഞുണങ്ങി നെൽപാടങ്ങൾ, വെള്ളമില്ലാതെ പെരുമ്പിലാവ് മേഖലയിൽ വ്യാപക കൃഷിനാശം, തൃശൂരിൽ ജലക്ഷാമം രൂക്ഷം

തൃശൂർ ജില്ലയിൽ ജലക്ഷാമവും ജലമലിനീകരണവും മൂലം നെൽപാടങ്ങൾ കൊയ്ത്തിനു മുൻപേ കരിഞ്ഞുണങ്ങുന്നത് കർഷകരെ ദുരിതത്തിലാക്കുന്നു. പെരുമ്പിലാവ്, കടവല്ലൂർ തുടങ്ങിയ മേഖലകളിലാണ് പ്രതിസന്ധി രൂക്ഷമായിരിക്കുന്നത്.  

തൃശൂർ: കൊയ്ത്തിന് പാകമാകും മുൻപേ കരിഞ്ഞുണങ്ങുന്ന നെൽപാടങ്ങൾ തൃശൂരിലെ കർഷകരെ കണ്ണീരിലാഴ്ത്തുന്നു. ജില്ലയുടെ വിവിധ ഭാഗങ്ങളിൽ ജലക്ഷാമവും ജലമലിനീകരണവും നെൽക്കൃഷിക്ക് വൻ ഭീഷണിയായിരിക്കുകയാണ്. പെരുമ്പിലാവ്, കടവല്ലൂർ മേഖലകളിലെ പാടശേഖരങ്ങളിലാണ് പ്രതിസന്ധി അതീവ രൂക്ഷമായിരിക്കുന്നത്.

പെരുമ്പിലാവ് പൂയംകുളം പാടശേഖരത്തിൽ കൃഷിയിറക്കിയ കിഴക്കേക്കര ഞാലിൽ സുജാതയുടെ ഒരേക്കറോളം വരുന്ന നെൽക്കൃഷി പൂർണ്ണമായും നശിച്ചു. ഏകദേശം 50,000 രൂപയോളം വരുമാനം ലഭിക്കേണ്ട കതിരിട്ട നെല്ലാണ് വെള്ളം ലഭിക്കാതെ പാടത്ത് കരിഞ്ഞുപോയത്. സാധാരണയായി ആശ്രയിച്ചിരുന്ന ക്ഷേത്രക്കുളത്തിൽ നിന്ന് ഇത്തവണ ജലസേചനത്തിന് അനുമതി ലഭിക്കാത്തതാണ് കൃഷി നശിക്കാൻ കാരണമായതെന്ന് സുജാതയുടെ ഭർത്താവ് പരമേശ്വരൻ പറഞ്ഞു.

കടവല്ലൂർ മേഖലയിലെ പാടശേഖരങ്ങളിലും സ്ഥിതി വ്യത്യസ്തമല്ല. കൊള്ളഞ്ചേരി, ഒറ്റപ്പിലാവ് എന്നിവിടങ്ങളിൽ കൊയ്ത്ത് പൂർത്തിയാകാൻ ഇനിയും ദിവസങ്ങൾ ബാക്കിയുണ്ട്. എന്നാൽ ജലസേചനത്തിന് ഉപയോഗിച്ചിരുന്ന തോടുകൾ വറ്റാൻ തുടങ്ങിയത് കർഷകരെ വലിയ ആശങ്കയിലാക്കുന്നു. മറ്റ് ആവശ്യങ്ങൾക്കായി വൻതോതിൽ ഭൂഗർഭജലം പമ്പ് ചെയ്ത് എടുക്കുന്നത് തോടുകളിലെ നീരൊഴുക്ക് കുറയാൻ കാരണമാകുന്നുണ്ടെന്ന് കർഷകർ പരാതിപ്പെടുന്നു. കൊയ്ത്ത് പൂർത്തിയായ ചുരുക്കം ചില കർഷകർക്ക് മാത്രമാണ് നിലവിൽ ആശ്വാസമുള്ളത്. ജില്ലയുടെ മറ്റ് ഭാഗങ്ങളിലേക്കും കൃഷിനാശം പടരുന്നത് തടയാൻ അധികൃതരുടെ ഭാഗത്തുനിന്ന് അടിയന്തര ഇടപെടൽ വേണമെന്നാണ് കർഷകരുടെ ആവശ്യം.