ഫേസ്ബുക്കിലൂടെ യുവതിയോട് സൗഹൃദം നടിച്ച് പീഡനശ്രമം; പൊലീസ് ഒരുക്കിയ കെണിയില്‍ യുവാവ് കുടുങ്ങി

വിവാഹതിയായ യുവതിയോട്  ഭര്‍ത്താവിന്‍റെ രഹസ്യബന്ധത്തിന് തെളിവ് നല്‍കാമെന്ന് പറഞ്ഞ് സന്ദേശം അയച്ചാണ് ഷിറില്‍ പരിചയപ്പെട്ടതെന്ന് പൊലീസ് പറ‍ഞ്ഞു.

തിരുവനന്തപുരം: ഫേസ്ബുക്കിലൂടെ സൗഹൃദം നടിച്ച് വിവാഹിതയായ യുവതിയെ ഭീഷണിപ്പെടുത്തി പീഡിപ്പിക്കാന്‍ ശ്രമിച്ച യുവാവ് അറസ്റ്റില്‍. വയനാട് മാനന്തവാടി സ്വദേശിയായ ഷിറില്‍ രാജ്(29) ആണ് പൊലീസ് ഒരുക്കിയ കെണിയില്‍ കുടുങ്ങിയത്.  വിവാഹതിയായ യുവതിയോട്  ഭര്‍ത്താവിന്‍റെ രഹസ്യബന്ധത്തിന് തെളിവ് നല്‍കാമെന്ന് പറഞ്ഞ് സന്ദേശം അയച്ചാണ് ഷിറില്‍ പരിചയപ്പെട്ടതെന്ന് പൊലീസ് പറ‍ഞ്ഞു.

ഇക്കാര്യം പറഞ്ഞ് നിരന്തരം യുവതിയെ ശല്യം ചെയ്ത യുവാവ് ഒടുവില്‍ ഭീഷണിപ്പെടുത്തി ഹോട്ടല്‍ മുറിയിലേക്ക് ക്ഷണിച്ചു. ഇതോടെ യുവതി വിവരം ഭര്‍ത്താവിനെ അറിയിച്ചു. ഭര്‍ത്താവിന്‍റെ പരാതിയെ തുടര്‍ന്ന് മ്യൂസിയം പൊലീസ് ഒരുക്കിയ കെമിയില്‍ പ്രതി കുടുങ്ങുകയായിരുന്നു.

യുവതിയെക്കൊണ്ട് തിരുവനന്തപുരത്തെ ഹോട്ടലില്‍ എത്താമെന്ന് പറയിപ്പിച്ച് പൊലീസ് കാത്തിരുന്നു. പാളയം ബസ്റ്റോപ്പിലെത്തിയ പ്രതിയെ പൊലീസ് കയ്യോടെ പൊക്കി. മ്യൂസിയം സിഐ പ്രശാന്തിന്‍റെ നേതൃത്വത്തിലുള്ള സംഘമാണ് പ്രതിയെ അറസ്റ്റ് ചെയ്തത്.