കഴിഞ്ഞ മാസം എട്ടാം തീയതി നടന്ന തർക്കം, തെറ്റിദ്ധരിച്ച് റോഡരികിൽ നിർത്തിയിട്ട മറ്റൊരാളുടെ ബൈക്ക് കത്തിച്ചു; പ്രതി ബിലാൽ അറസ്റ്റിൽ

ആലപ്പുഴ സ്വദേശിയായ മുഹമ്മദ് ബിലാലിനെയാണ് ടൗൺ നോർത്ത് പൊലീസ് പിടികൂടിയത്. യുവാക്കൾ സ്ഥലത്തു നിന്ന് പോയതിന് പിന്നാലെ സമീപത്ത് പാർക്ക് ചെയ്തിരുന്ന ബൈക്ക് അവരുടേതാണെന്ന് തെറ്റിദ്ധരിച്ച് ബിലാൽ അതിന് തീകൊളുത്തുകയായിരുന്നെന്ന് പൊലീസ് പറഞ്ഞു.

കൊച്ചി: വഴിയിൽ പാർക്ക് ചെയ്തിരുന്ന ബൈക്ക് തെറ്റിദ്ധാരണയുടെ പേരിൽ കത്തിച്ച കേസിൽ യുവാവ് അറസ്റ്റിൽ. ആലപ്പുഴ അരൂക്കുറ്റി വെളിപറമ്പിൽ വീട്ടിൽ മുഹമ്മദ് ബിലാൽ (28) ആണ് എറണാകുളം ടൗൺ നോർത്ത് പൊലീസിന്റെ പിടിയിലായത്. ഒട്ടേറെ ക്രിമിനൽ കേസുകളിൽ പ്രതിയായ ബിലാലിനെ ഇടുക്കി പൊലീസിന്റെ സഹായത്തോടെയാണ് പിടികൂടിയത്. കഴിഞ്ഞ ഓഗസ്റ്റ് 8ന് രാത്രി 11നായിരുന്നു സംഭവം. എറണാകുളം എസ്ആർഎം റോഡിൽ ബിലാലും മറ്റു ചില യുവാക്കളും തമ്മിൽ തർക്കമുണ്ടായിരുന്നു.

യുവാക്കൾ സ്ഥലത്തു നിന്ന് പോയതിന് പിന്നാലെ സമീപത്ത് പാർക്ക് ചെയ്തിരുന്ന ബൈക്ക് അവരുടേതാണെന്ന് തെറ്റിദ്ധരിച്ച് ബിലാൽ അതിന് തീകൊളുത്തുകയായിരുന്നെന്ന് പൊലീസ് പറഞ്ഞു. എസിപി സിബി ടോം, ടൗൺ നോർത്ത് ഇൻസ്പെക്ടർ സന്തോഷ്കുമാർ, ഇടുക്കി എസ്ഐമാരായ പി വി മഹേഷ്, ഇ എം ഷാജി, എഎസ്ഐ സന്തോഷ്, സുനിൽ ജലീൽ, സീനിയർ സിവിൽ പൊലീസ് ഓഫിസർമാരായ സുമേഷ്, അജിലേഷ്, പ്രശാന്ത് ബാബു, ഹരീഷ് ബാബു, ജിമ്മി, വിപിൻ എന്നിവർ ഉൾപ്പെട്ട സംഘമാണ് പ്രതിയെ പിടികൂടിയത്.