വാഹന പരിശോധനയിൽ കുടുങ്ങാതിരിക്കാൻ ബസിൽ നിന്നും ഇറങ്ങി, ബൈക്കിൽ പോകാൻ ശ്രമിച്ചു; എംഡിഎംഎയുമായി യുവാവ് പിടിയിൽ

തമിഴ്‌നാട്ടിൽ നിന്നും കേരളത്തിലേക്ക് 52 ഗ്രാം എംഡിഎംഎ കടത്തിയ കോഴിക്കോട് സ്വദേശിയായ യുവാവിനെ തിരുവനന്തപുരത്ത് എക്സൈസ് അറസ്റ്റ് ചെയ്തു. വാഹന പരിശോധന വെട്ടിക്കാൻ ബസിൽ നിന്നിറങ്ങി സുഹൃത്തിനെ കാത്തുനിൽക്കുമ്പോഴാണ് ഇയാൾ പിടിയിലായത്.

തിരുവനന്തപുരം: തമിഴ്‌നാട്ടിൽ നിന്നും കേരളത്തിലേക്ക് കടത്തിയ 52 ഗ്രാം എംഡിഎംഎയുമായി യുവാവ് എക്സൈസിന്‍റെ പിടിയിലായി. കോഴിക്കോട് വടകര സ്വദേശിയായ മുഹമ്മദ് ഷമീം (38) ആണ് അറസ്റ്റിലായത്. വാഹന പരിശോധനയിൽ കുടുങ്ങാതിരിക്കാൻ ബസിൽ നിന്നും ചെങ്കവിള ഭാഗത്ത് ഇറങ്ങി, ബൈക്കിൽ എത്തുമെന്ന് പറഞ്ഞിരുന്ന സുഹൃത്തിനെ കാത്ത് നിൽക്കുമ്പോൾ എക്‌സൈസിന്‍റെ പിടിയിലാവുകയായിരുന്നു.

വള്ളക്കടവ് സ്വദേശിക്ക് കൈമാറുന്നതിനായി കൊണ്ടുവന്ന എംഡിഎംഎ വ്യാവസായിക അടിസ്ഥാനത്തിൽ എത്തിച്ചതാണെന്ന് എക്‌സൈസ് സ്ഥിരീകരിച്ചു. എക്സൈസ് എൻഫോഴ്സ്മെന്റ് സ്ക്വാഡിന്റെ ചുമതലയുള്ള അസിസ്റ്റന്റ് എക്സൈസ് കമ്മീഷണർ ജി കൃഷ്ണകുമാറിന് ലഭിച്ച രഹസ്യ വിവരത്തിന്റെ അടിസ്ഥാനത്തിലായിരുന്നു അറസ്റ്റ്. സ്ക്വാഡ് അംഗങ്ങളായ സർക്കിൾ ഇൻസ്പെക്ടർമാരായ കെ വി വിനോദ്, ആർ ജി രാജേഷ്, പ്രിവന്റീവ് ഓഫീസർ (ഗ്രേഡ്) രജിത്ത് കെ ആർ, സിവിൽ എക്സൈസ് ഓഫീസർ ബി പ്രസന്നൻ, സിവിൽ എക്സൈസ് ഓഫീസർ ഡ്രൈവർ വിനോജ് ഖാൻ സേട്ട്, നെയ്യാറ്റിൻകര എക്സൈസ് സർക്കിൾ ഓഫീസിലെ സർക്കിൾ ഇൻസ്പെക്ടർ ടി രാജു, അസി. എക്സൈസ് ഇൻസ്പെക്ടർ കൃഷ്ണരാജ്, സിവിൽ എക്സൈസ് ഓഫീസർമാരായ രഞ്ജിത്ത്, ജിനേഷ്, മുഹമ്മദ് അനീസ് എന്നിവരടങ്ങുന്ന സംഘമാണ് പ്രതിയെ അറസ്റ്റ് ചെയ്തത്. ഇയാളുടെ സുഹൃത്തുക്കൾക്കായി അന്വേഷണം വ്യാപിപ്പിച്ചു.