കൊച്ചിയിൽ പൊലീസിൻ്റെ ഗുണ്ടായിസം, പിടിച്ചുപറി! മർദിച്ച് പണം തട്ടിയെന്ന് യുവാക്കൾ; മുഖ്യമന്ത്രിക്ക് പരാതി നൽകി

കൊച്ചി പുതുവൈപ്പ് ബീച്ചിൽ വെച്ച് രണ്ട് യുവാക്കളെ പൊലീസ് ഉദ്യോഗസ്ഥർ മർദ്ദിച്ചതായി പരാതി. സ്വകാര്യ വാഹനത്തിൻ്റെ അമിതവേഗത ചോദ്യം ചെയ്തതാണ് മർദ്ദനത്തിന് കാരണമെന്നും, ഉദ്യോഗസ്ഥർ പണം തട്ടിയെടുത്തെന്നും യുവാക്കൾ ആരോപിക്കുന്നു

കൊച്ചി: പൊലീസ് ഉദ്യോഗസ്ഥർ യുവാക്കളെ മർദ്ദിച്ചെന്ന് പരാതി. എറണാകുളം പുതുവൈപ്പ് ബീച്ച് പരിസരത്ത് വെച്ച് ഇന്നലെയാണ് സംഭവം. പുതുവൈപ്പ് സ്വദേശികളായ നിതിൻ ലിൻകൺ , നെസ്റ്റൺ എന്നിവർക്കാണ് മർദ്ദനമേറ്റത്. ഞാറയ്ക്കൽ സ്റ്റേഷനിലെ ഉദ്യേഗസ്ഥരാണ് മർദ്ദിച്ചതെന്ന് പരാതിയിൽ പറയുന്നു. യുവാളുടെ പക്കൽ നിന്ന് 4700 രൂപയും 100 പൗണ്ടും ഉദ്യോഗസ്ഥർ തട്ടിയെടുത്തതായും ആരോപണമുണ്ട്. പൊലീസ് ഉദ്യോഗസ്ഥർ സ്വകാര്യ വാഹനത്തിലാണ് സഞ്ചരിച്ചിരുന്നതെന്നും വാഹനത്തിൻ്റെ അമിത വേഗത ചോദ്യം ചെയ്തതാണ് മർദ്ദനത്തിന് കാരണമെന്നും യുവാക്കൾ പറയുന്നു. സംഭവത്തിൽ മുഖ്യമന്ത്രിക്കും ഡിജിപിക്കും യുവാക്കൾ പരാതി നൽകി.