യൂട്യൂബ് ഷോപ്പിങ്ങിൽ വൻ മാറ്റങ്ങൾ; ഇന്ത്യയിലെ ക്രിയേറ്റർമാർക്കായി പുതിയ എഐ ടൂളുകളും

ഇന്ത്യയിലെ ക്രിയേറ്റർമാർക്കായി ഷോപ്പിങ് സംവിധാനങ്ങളും പുതിയ എഐ ടൂളുകളും വിപുലീകരിച്ച് യൂട്യൂബ്. ആമസോൺ ഉൾപ്പെടെയുള്ള പ്രമുഖ ബ്രാൻഡുകളെ അഫിലിയേറ്റ് പദ്ധതിയിൽ ഉൾപ്പെടുത്തിയതിലൂടെ ക്രിയേറ്റർമാർക്ക് മികച്ച വരുമാനം നേടാം. കൂടാതെ, വീഡിയോ എഡിറ്റിങ്ങിനും ബ്രാൻഡ് സഹകരണത്തിനുമായി നൂതന എഐ ഫീച്ചറുകളും പ്ലാറ്റ്‌ഫോം അവതരിപ്പിച്ചിട്ടുണ്ട്.

ഇന്ത്യയിലെ ക്രിയേറ്റർമാർക്കായുള്ള ഷോപ്പിങ് സംവിധാനങ്ങൾ വിപുലീകരിച്ച് യൂട്യൂബ്. പുതിയ എഐ അധിഷ്ഠിത ടൂളുകൾ ഉൾപ്പെടെ നിരവധി ഫീച്ചറുകളാണ് പ്ലാറ്റ്ഫോം അവതരിപ്പിച്ചത്. ഉത്സവകാല വിൽപ്പന മുന്നിൽക്കണ്ട് യൂട്യൂബ് ഷോപ്പിങ് അഫിലിയേറ്റ് പദ്ധതിയിലേക്ക് കൂടുതൽ പ്രമുഖ വ്യാപാര പങ്കാളികളെയും ഉൾപ്പെടുത്തിയിട്ടുണ്ട്.

ആമസോണും ഇനി യൂട്യൂബ് ഷോപ്പിങ്ങിന്റെ ഭാഗം

ഇന്ത്യയിലെ യൂട്യൂബ് ഷോപ്പിങ് അഫിലിയേറ്റ് പദ്ധതിയിലേക്ക് ആമസോണിനെ കൂടി ഉൾപ്പെടുത്തിയതായി യൂട്യൂബ് അറിയിച്ചു. അജിയോ, മീഷോ, സ്നാപ്ഡീൽ, ടാറ്റാ ക്ലിക്ക് എന്നിവയും പുതിയതായി പദ്ധതിയുടെ ഭാഗമായിട്ടുണ്ട്. ഫ്ലിപ്‍കാർട്ട്, മിന്ത്ര, നൈക, പർപ്പിൾ, ഷോപ്പ്സി, ടിറ എന്നിവ നേരത്തെ തന്നെ യൂട്യൂബ് ഷോപ്പിങ്ങിന്റെ പങ്കാളികളായിരുന്നു. 2024 ഒക്ടോബറിലാണ് ഇന്ത്യയിൽ യൂട്യൂബ് ഷോപ്പിങ് ആരംഭിച്ചത്.

യൂട്യൂബ് പങ്കാളിത്ത പദ്ധതിയിൽ ഉൾപ്പെട്ട ക്രിയേറ്റർമാർക്ക് അവരുടെ വീഡിയോകളിലൂടെ ഉൽപ്പന്നങ്ങൾ ശുപാർശ ചെയ്യാനും അതുവഴി നടക്കുന്ന ഓരോ വിൽപ്പനയ്ക്കും കമ്മീഷൻ നേടാനും ഇതിലൂടെ സാധിക്കും. ദൈർഘ്യമേറിയ വീഡിയോകൾ, ഷോർട്സ്, തത്സമയ സംപ്രേഷണം എന്നിവയിലും ഉൽപ്പന്നങ്ങൾ പ്രമോട്ട് ചെയ്യാം.

ക്രിയേറ്റർമാരുടെ വരുമാനത്തിൽ വൻ വർധന

ഇന്ത്യയിൽ ഷോപ്പിങ്ങിലൂടെ ക്രിയേറ്റർമാർ നേടുന്ന വരുമാനം വലിയ തോതിൽ ഉയരുന്ന സാഹചര്യത്തിലാണ് പുതിയ മാറ്റങ്ങളെന്ന് യൂട്യൂബ് വ്യക്തമാക്കി. 2025ലെ ആദ്യ പാദം മുതൽ 2026ലെ ആദ്യ പാദം വരെയുള്ള കാലയളവിൽ ഇന്ത്യയിലെ ക്രിയേറ്റർമാരുടെ ശരാശരി അഫിലിയേറ്റ് വരുമാനം 160 ശതമാനത്തിലധികം വർധിച്ചു. ആഗോളതലത്തിൽ ഇതേ കാലയളവിലെ വളർച്ച 100 ശതമാനമായിരുന്നു. ഇന്ത്യയിൽ 450 ദശലക്ഷത്തിലധികം ആളുകൾ യൂട്യൂബിൽ ഷോപ്പിങ്ങുമായി ബന്ധപ്പെട്ട ഉള്ളടക്കങ്ങൾ തിരയുന്നുണ്ടെന്നും കഴിഞ്ഞ വർഷത്തെ അപേക്ഷിച്ച് ഷോപ്പിങ് സംബന്ധമായ വീഡിയോകൾ കാണുന്ന സമയത്തിൽ 55 ശതമാനം വർധനയുണ്ടായെന്നും യൂട്യൂബ് അറിയിച്ചു.

വീഡിയോ കാണുന്നതിനിടെ ഉൽപ്പന്നങ്ങളെക്കുറിച്ച് ചോദിക്കാം

ഷോപ്പിങ്ങിനായി പുതിയ എഐ സംവിധാനങ്ങളും യൂട്യൂബ് അവതരിപ്പിച്ചിട്ടുണ്ട്. വീഡിയോ കാണുന്നതിനിടെ ഉൽപ്പന്നത്തിന്റെ സവിശേഷതകൾ ഉൾപ്പെടെയുള്ള വിവരങ്ങൾ നേരിട്ട് ചോദിക്കാൻ സഹായിക്കുന്ന പുതിയ സംവിധാനമാണ് ഇതിൽ പ്രധാനം. വീഡിയോയുടെ വാച്ച് പേജിൽ നിന്ന് ചോദ്യങ്ങൾ ചോദിക്കാം. ചാറ്റ്ബോട്ട് മാതൃകയിൽ തുടർചോദ്യങ്ങളും ഉന്നയിക്കാനാകും. ടെലിവിഷനിൽ യൂട്യൂബ് ഉപയോഗിക്കുമ്പോൾ ശബ്ദ നിർദേശങ്ങളിലൂടെയും ഈ സംവിധാനവുമായി സംവദിക്കാനാകും.

വിദേശ പ്രേക്ഷകരിൽ നിന്നും ഇന്ത്യൻ ക്രിയേറ്റർമാർക്ക് കമ്മീഷൻ

ആഗോള പ്രേക്ഷകരുള്ള ക്രിയേറ്റർമാർക്കായും പുതിയ സൗകര്യം അവതരിപ്പിച്ചിട്ടുണ്ട്. പ്രേക്ഷകൻ ഏത് പ്രദേശത്താണെന്നതനുസരിച്ച് ഉൽപ്പന്ന ടാഗുകൾ യൂട്യൂബ് സ്വമേധയാ മാറ്റും. ഇതുവഴി പ്രേക്ഷകരെ അവരുടെ പ്രദേശത്തെ റീട്ടെയിലർമാരുടെ ഓഫറുകളിലേക്കാണ് എത്തിക്കുക. വില പ്രാദേശിക കറൻസിയിലും പ്രദർശിപ്പിക്കും. ഇതിലൂടെ ഇന്ത്യൻ ക്രിയേറ്റർമാർക്ക് വിദേശ പ്രേക്ഷകരിൽ നിന്നുള്ള വിൽപ്പനയിലും കമ്മീഷൻ നേടാൻ സാധിക്കും.

ബ്രാൻഡുകളുമായി സഹകരിക്കാനും എഐ സഹായം

ബ്രാൻഡ് പങ്കാളിത്തത്തിനായി ക്രിയേറ്റർമാർക്ക് പുതിയ എഐ സംവിധാനവും യൂട്യൂബ് അവതരിപ്പിച്ചു. ക്യാമ്പെയ്‌നുകൾക്കായി ബ്രാൻഡുകൾക്ക് നിർദേശം നൽകാനും ബ്രാൻഡുകളിൽ നിന്നുള്ള പ്രതികരണങ്ങൾക്ക് മറുപടി നൽകാനും എഐ സഹായിക്കുന്ന സംവിധാനമാണിത്. അഫിലിയേറ്റ് ലിങ്കുകൾ ഉപയോഗിച്ച് ക്രിയേറ്റർമാർ തയ്യാറാക്കിയ സ്വാഭാവിക ഉള്ളടക്കം പ്രചരിപ്പിക്കാൻ ബ്രാൻഡുകൾക്ക് സഹായിക്കുന്ന സംവിധാനവും യൂട്യൂബ് അവതരിപ്പിച്ചിട്ടുണ്ട്. 2027ൽ ഇന്ത്യയിൽ പ്രത്യേക അഫിലിയേറ്റ് ക്യാമ്പെയ്‌നുകളും ആരംഭിക്കുമെന്ന് യൂട്യൂബ് അറിയിച്ചു. ഇതിലൂടെ ബ്രാൻഡുകൾക്ക് ക്രിയേറ്റർമാരെ നേരിട്ട് ക്ഷണിക്കാനും അധിക ആനുകൂല്യങ്ങളും ഉയർന്ന കമ്മീഷൻ നിരക്കുകളും വാഗ്ദാനം ചെയ്യാനും സാധിക്കും.

വീഡിയോ എഡിറ്റിങ്ങിലും എഐയുടെ സഹായം

ന്യൂയോർക്കിൽ നടന്ന ‘മെയ്ഡ് ഓൺ യൂട്യൂബ്’ പരിപാടിയിലാണ് പുതിയ എഐ അധിഷ്ഠിത ക്രിയേറ്റർ ടൂളുകളും കമ്പനി പ്രഖ്യാപിച്ചത്. പ്രസിദ്ധീകരിക്കാത്ത വീഡിയോകൾക്ക് എഐയുടെ സഹായത്തോടെ നിർദേശങ്ങൾ നൽകുന്ന സംവിധാനം, വീഡിയോയുടെ തലക്കെട്ടിനും തമ്പ്‌നെയിലിനുമുള്ള നിർദേശങ്ങൾ എന്നിവ ഇതിൽ ഉൾപ്പെടുന്നു. ഡൈനാമിക് തമ്പ്‌നെയിലുകളും തമ്പ്‌നെയിലുകളുടെ പ്രകടനം സ്വമേധയാ നിരീക്ഷിക്കുന്ന സംവിധാനവും ഈ വർഷം തന്നെ എത്തും.

ഷോർട്സിലും യൂട്യൂബ് ക്രിയേറ്റ് ആപ്പിലും ജെമിനി അടിസ്ഥാനമാക്കിയുള്ള സംഭാഷണത്തിലൂടെയുള്ള വീഡിയോ എഡിറ്റിങ് സംവിധാനവും അവതരിപ്പിക്കും. വീഡിയോകൾ എഡിറ്റ് ചെയ്യുന്നത് കൂടുതൽ എളുപ്പമാക്കുകയാണ് ലക്ഷ്യം. എഐ ഉപയോഗിച്ചുള്ള കമന്റ് നിയന്ത്രണ സംവിധാനവും യൂട്യൂബ് പരീക്ഷിക്കുന്നുണ്ട്. ശബ്ദവും മുഖവും തിരിച്ചറിയുന്ന സാങ്കേതികവിദ്യ ഉപയോഗിച്ച് വ്യക്തികളുടെ രൂപവും ശബ്ദവും ദുരുപയോഗം ചെയ്യുന്നതിനെതിരെ സംരക്ഷണം നൽകുന്ന സംവിധാനവും കൂടുതൽ വിപുലീകരിക്കുമെന്ന് യൂട്യൂബ് അറിയിച്ചു.