ഒരു ലക്ഷം കോടി രൂപയ്ക്ക് ഫ്ലിപ്കാർട്ടിനെ വാൾമാർട്ട് സ്വന്തമാക്കി

1,07,200 കോടി രൂപയ്ക്കാണ് ഫ്ലിപ്കാർട്ടിന്റെ ഭൂരിപക്ഷം ഓഹരികളും വാൾമാർട്ട് സ്വന്തമാക്കിയത്.

​ഗുരു​ഗ്രാം: ഇ-കൊമേഴ്സ് കമ്പനിയായ ഫ്ലിപ്കാർട്ടിനെ വാൾമാർട്ട് ഏറ്റെടുത്തു. ഇതു സംബന്ധിച്ച ഔദ്യോ​ഗിക പ്രഖ്യാപനം അൽപസമയത്തിനകം വാൾമാർട്ടിൽ നിന്നുണ്ടാവും. ഫ്ലിപ്കാർട്ടിന്റെ 77 ശതമാനം ഓഹരികൾ ഏറ്റെടുത്തു കൊണ്ടാണ് അമേരിക്കൻ കമ്പനിയായ വാൾമാർട്ട് ഇന്ത്യൻ വിപണിയിലേക്ക് രം​ഗപ്രവേശനം ചെയ്യുന്നത്. 

1,07,200 കോടി രൂപയ്ക്കാണ് ഫ്ലിപ്കാർട്ടിന്റെ ഭൂരിപക്ഷം ഓഹരികളും വാൾമാർട്ട് സ്വന്തമാക്കിയത്. ഇന്ത്യൻ വ്യവസായ ചരിത്രത്തിൽ ഇത്രയും ഉയർന്ന തുകയ്ക്ക് ഒരു കമ്പനിയെ ഏറ്റെടുക്കുന്നത് ഇതാദ്യമായാണ്. 2007-ൽ ബെം​ഗളൂരു ആസ്ഥാനമായാണ് ഫ്ലിപ്കാർട്ട് പ്രവർത്തനം ആരംഭിക്കുന്നത്.

ദില്ലി ഐഐടിയിലെ വിദ്യാർത്ഥികളും മുൻ ആമസോൺ ജീവനക്കാരുമായ സച്ചിൻ ബൻസൽ, ബിന്നി ബൻസൽ എന്നിവർ ചേർന്നാണ് ഫ്ലിപ്കാർട്ടിന് തുടക്കം കുറിച്ചത്. ആരംഭകാലത്ത് പുസ്തക വിൽപനയിൽ മാത്രം ശ്രദ്ധ കേന്ദ്രീകരിച്ചിരുന്ന ഫ്ലിപ്കാർട്ട് പിൻക്കാലത്ത് ഇ-കൊമേഴ്സ് രം​ഗത്തെ മുൻനിര കമ്പനിയായി മാറുകയായിരുന്നു.