കുമ്മനം തിരുവനന്തപുരത്ത് ചരിത്രം കുറിക്കും; മടങ്ങിവരവ് ബിജെപിക്ക് ഗുണം ചെയ്യുമെന്ന് വി മുരളീധരൻ

കുമ്മനത്തിന്‍റെ മടങ്ങി വരവ് കേരളത്തിലെ ബിജെപിക്ക് മുതൽകൂട്ടാകും. തിരുവനന്തപുരം മണ്ഡലത്തിന് അനുയോജ്യനായ സ്ഥാനാർത്ഥിയെന്നും വി മുരളീധരൻ

ദില്ലി: കുമ്മനത്തിന്‍റെ തിരിച്ച് വരവ് കേരളത്തിലെ ബിജെപിക്ക് വലിയ ഗുണം ചെയ്യുമെന്ന് ബിജെപി നേതാവും എംപിയുമായ വി മുരളീധരൻ. കുമ്മനം രാജശേഖരൻ തിരുവനന്തപുരം മണ്ഡലത്തിന് അനുയോജ്യനായ സ്ഥാനാർത്ഥിയാണ്. തിരുവനന്തപുരത്ത് കുമ്മനം ചരിത്രം സൃഷ്ടിക്കുമെന്നും വി മുരളീധരൻ ദില്ലിയിൽ പറഞ്ഞു.

മിസോറാം ഗവർണർ സ്ഥാനം രാജി വച്ച് കുമ്മനം കേരളത്തിലേക്ക് മടങ്ങുന്നു എന്ന വാർത്തയോടാണ് വി മുരളീധരന്‍റെ പ്രതികരണം. ആർഎസ്എസിന്‍റെ പ്രത്യേക താൽപര്യ പ്രകാരം ബിജെപി ദേശീയ നേതൃത്വവും പ്രധാനമന്ത്രി നരേന്ദ്ര മോദിയും നേരിട്ടിടപെട്ടാണ് കുമ്മനത്തിന്‍റെ മടങ്ങി വരവ് .