ട്രാൻസ്ജെൻഡർ ആയതിനുശേഷം രണ്ടാമത്തെ തെരഞ്ഞെടുപ്പ്; നരേഷ് ജെയ്സ്വാൾ അഹമ്മദാബാദിൽ മത്സരിക്കും

അഹമ്മദാബാദിൽ കോൺഗ്രസ് സ്ഥാനാർത്ഥി ​ഗീത പട്ടേലിനെതിരേയാണ് നരേഷ് മത്സരിക്കുന്നത്. ഇവിടെ ബിജെപി ഇതുവരെ സ്ഥാനാർത്ഥിയെ പ്രഖ്യാപിച്ചിട്ടില്ല. 

അഹമ്മദാബാദ്: ഇത്തവണത്തെ ലോക്സഭാ തെരഞ്ഞെടുപ്പിൽ‌ മത്സരിക്കാൻ ഒരുങ്ങുകയാണ് അഹമ്മദാബാദിൽ നിന്നുള്ള ട്രാൻസ്ജെൻഡർ നരേഷ് ജെയ്സ്വാൾ. 28 വയസുള്ള നരേഷ് ഗുജറാത്തിലെ പടിഞ്ഞാറെ അഹമ്മദാബാദിലാണ് മത്സരിക്കുക. ബുധനാഴ്ച തെരഞ്ഞെടുപ്പ് കമ്മീഷൻ ഉദ്യോ​ഗസ്ഥർക്ക് മുമ്പാകെ നരേഷ് നാമനിർദ്ദേശിക പത്രിക സമർപ്പിച്ചു. 

അഹമ്മദാബാദിലെ രാഖിയാൽ സ്വദേശിയാണ് നരേഷ്. അഹമ്മദാബാദിൽ കോൺഗ്രസ് സ്ഥാനാർത്ഥി ​ഗീത പട്ടേലിനെതിരേയാണ് നരേഷ് മത്സരിക്കുന്നത്. ഇവിടെ ബിജെപി ഇതുവരെ സ്ഥാനാർത്ഥിയെ പ്രഖ്യാപിച്ചിട്ടില്ല. അതേസമയം, ബിജെപി നേതാവും സിറ്റിങ് എംപിയുമായ പരേഷ് റവാൽ മത്സരിക്കാൻ താൽപര്യമില്ലെന്ന് കാണിച്ചതിനെ തുടർന്ന് ബിജെപി പ്രതിസന്ധിയിലാണ്. 

ഇത് രണ്ടാം തവണയാണ് നരേഷ് തെരഞ്ഞെടുപ്പിനെ നേരിടുന്നത്. 2015-ൽ അഹമ്മദാഹബാദ് കോർപ്പറേഷൻ തെരഞ്ഞെടുപ്പിൽ നരേഷ് മത്സരിച്ചിരുന്നു. ഒരു മാറ്റത്തിനു വേണ്ടിയാണ് താൻ തെരഞ്ഞെടുപ്പിൽ മത്സരിക്കുന്നതെന്നും തെരഞ്ഞെടുപ്പിൽ സ്ഥാനാർത്ഥിയെ തെരഞ്ഞെടുക്കേണ്ടത് പാർട്ടി നോക്കിയിട്ടല്ലെന്നും നരേഷ് പറഞ്ഞു. 

കഴിഞ്ഞ മാസം, പ്രയാ​ഗ്രാജ് ലോക്സഭാ മണ്ഡലത്തിൽ ആം ആദ്മി പാർട്ടി സ്ഥാനാർത്ഥിയായി പ്രഖ്യാപിച്ചത് ട്രാൻസ്ജെൻഡർ ഭവാനി മായെ ആയിരുന്നു. ആന്ധ്രാപ്രദേശിലെ മൻ​ഗ്‍ലാ​ഗിരി ലോക്സഭാ മണ്ഡലത്തിൽ ട്രാൻസ്ജെൻഡർ തമ്മന്ന സിംഹാദ്രിയാണ് മത്സരിക്കുന്നത്.