നിക്ഷേപങ്ങൾക്ക് പലിശ ഉയർത്തി ഈ ബാങ്ക്; തീരുമാനം റിപ്പോ ഉയരുന്നതിന് പിറകെ

റിപ്പോ ഉയരുന്നതിന് പിന്നാലെ രാജ്യത്തെ വിവിധ പൊതുമേഖലാ- സ്വകാര്യ ബാങ്കുകൾ നിക്ഷേപ വായ്പാ നിരക്കുകൾ ഉയർത്തി തുടങ്ങി. ഫിക്സഡ് ഡെപോസിറ്റിന്റെ നിരക്ക് ഉയർത്തി ഈ സ്വകാര്യ മേഖല വായ്പ ദാതാവ്   

ദില്ലി: ആർബിഐ റിപ്പോ നിരക്ക് വർധിപ്പിച്ച് ദിസങ്ങൾക്കുള്ളിൽ സ്ഥിര നിക്ഷേപങ്ങളുടെ പലിശ നിരക്ക് ഉയർത്തി ആക്‌സിസ് ബാങ്ക്. ആർബിഐയുടെ ധന നയ കമ്മിറ്റി റിപ്പോ നിരക്ക് 25 ബിപിഎസ് വർധിപ്പിച്ച് 6.50 ശതമാനമാക്കിയിരുന്നു. ഇതോടെ രാജ്യത്തെ പൊതുമേഖലാ- സ്വകാര്യ ബാങ്കുകൾ നിക്ഷേപ വായ്പാ നിരക്കുകൾ ഉയർത്തി തുടങ്ങി. രണ്ട് കോടി രൂപയിൽ താഴെയുള്ള സ്ഥിര നിക്ഷേപങ്ങളുടെ പലിശ നിരക്കാണ് സ്വകാര്യ മേഖലയിലെ വായ്പാ ദാതാവായ ആക്‌സിസ് ബാങ്ക് ഉയർത്തിയത്. പുതിയ നിരക്കുകൾ 2023 ഫെബ്രുവരി 11 ശനിയാഴ്ച മുതൽ പ്രാബല്യത്തിൽ വരും.

ആക്സിസ് ബാങ്കിന്റെ പുതുക്കിയ ഫിക്സഡ് ഡിപ്പോസിറ്റ് (എഫ്ഡി) നിരക്കുകൾ

1. ഒരാഴ്ച മുതൽ 45 ദിവസം വരെ കാലാവധിയുള്ള നിക്ഷേപങ്ങളുടെ പലിശ നിരക്ക് ആക്‌സിസ് ബാങ്ക് 3.50 ശതമാനമായി ഉയർത്തി.

2.  46 ദിവസം മുതൽ 60 ദിവസങ്ങൾക്കുള്ളിൽ കാലാവധി പൂർത്തിയാകുന്ന നിക്ഷേപങ്ങൾക്ക് ആക്‌സിസ് ബാങ്ക് 4.00 ശതമാനം പലിശ നൽകും. 61 ദിവസം മുതൽ മൂന്ന് മാസം വരെയും മൂന്ന് മാസം മുതൽ ആറ് മാസം വരെയുമുള്ള നിക്ഷേപ നിരക്കുകൾ യഥാക്രമം 4.50 ശതമാനം  4.75 ശതമാനം എന്നിങ്ങനെ ഉയർത്തി.

3. 6 മുതൽ 9 മാസം വരെ കാലാവധിയുള്ള നിക്ഷേപങ്ങളുടെ പലിശ നിരക്ക് 5.75 ശതമാനം  ആയി വർദ്ധിച്ചു, 9 മുതൽ 12 മാസം വരെ കാലാവധിയുള്ള നിക്ഷേപങ്ങളുടെ പലിശ നിരക്ക് 6 ശതമാനം ആയി ഉയർത്തി.

4. ബാങ്കിന് ഇപ്പോൾ ഒരു വർഷത്തിനും ഒന്നര വർഷത്തിനും ഒരു വർഷത്തിനും ഇടയിൽ കാലാവധി പൂർത്തിയാക്കുന്ന നിക്ഷേപങ്ങളുടെ പലിശ നിരക്ക്  6.75 ശതമാനം  നിരക്കിലും ഒന്നര വർഷം മുതൽ രണ്ട് വർഷം വരെ കാലാവധി പൂർത്തിയാക്കുന്ന നിക്ഷേപങ്ങൾക്ക്  7.10 ശതമാനം വരെ പലിശ നൽകും.  2 വർഷം മുതൽ 3 വർഷം വരെ കാലാവധിയുള്ള നിക്ഷേപങ്ങൾക്ക്  7.26 ശതമാനം പലിശ ലഭിക്കും.

5. ആക്‌സിസ് ബാങ്ക് ഇപ്പോൾ 30 മാസം മുതൽ 10 വർഷം വരെയുള്ള നിക്ഷേപങ്ങൾക്ക് 7 ശതമാനം പലിശ നൽകുന്നു. മുതിർന്ന പൗരന്മാർക്ക് 6 മാസം മുതൽ 10 വർഷം വരെ കാലാവധിയുള്ള സ്ഥിര നിക്ഷേപങ്ങൾക്ക് സാധാരണ നിരക്കുകൾക്ക് പുറമേ അധിക പലിശ നിരക്ക് ലഭിക്കും.