കര്ഷകരുടെ 'പരിപ്പിളകും': പരിപ്പ് ഇറക്കുമതിക്ക് കടിഞ്ഞാണിട്ട് കേന്ദ്രം, ഇറക്കുമതിക്ക് 30 ശതമാനം തീരുവ ചുമത്തും
Synopsis
നവംബര് 1 മുതല് പരിപ്പ് ഇറക്കുമതിക്ക് 30 ശതമാനം തീരുവ ചുമത്തും. പരിപ്പിന് 2023 ഡിസംബര് മുതല് അനുവദിച്ചിരുന്ന തീരുവ രഹിത ഇറക്കുമതിയാണ് ഇതോടെ അവസാനിക്കുന്നത്
രാജ്യത്തെ പയറുവര്ഗങ്ങളുടെ വിപണി വില വര്ധിപ്പിക്കുന്നതിനും കര്ഷകര്ക്ക് കൂടുതല് വരുമാനം ഉറപ്പാക്കുന്നതിനുമുള്ള സുപ്രധാന തീരുമാനവുമായി കേന്ദ്രം. ഇതിന്റെ ഭാഗമായി നവംബര് 1 മുതല് പരിപ്പ് ഇറക്കുമതിക്ക് 30 ശതമാനം തീരുവ ചുമത്തും. പരിപ്പിന് 2023 ഡിസംബര് മുതല് അനുവദിച്ചിരുന്ന തീരുവ രഹിത ഇറക്കുമതിയാണ് ഇതോടെ അവസാനിക്കുന്നത്. ധനകാര്യ മന്ത്രാലയം പുറത്തിറക്കിയ വിജ്ഞാപനം അനുസരിച്ച്, പരിപ്പ് ഇറക്കുമതിക്ക് 10% ഇറക്കുമതി തീരുവയും 20% കാര്ഷിക അടിസ്ഥാന സൗകര്യ വികസന സെസ്സും ഈടാക്കും. മൊത്തം തീരുവ 30% വരും. നികുതി ഈടാക്കുന്നത് നവംബര് ഒന്നിന് ശേഷം മാത്രമായിരിക്കും. ഇന്ത്യന് പയറുവര്ഗ്ഗ, ധാന്യ അസോസിയേഷനായ ഐപിജിഎ നേരത്തെ, വില കുറഞ്ഞ പരിപ്പ് ഇറക്കുമതി ചെയ്യുന്നത് രാജ്യത്തെ കമ്പോളവിലകളെ തകര്ക്കുമെന്നും, പയറുവര്ഗ്ഗങ്ങള് ഉത്പാദിപ്പിക്കുന്ന 50% ഓളം വരുന്ന കര്ഷകരെ പ്രതികൂലമായി ബാധിക്കുമെന്നും മുന്നറിയിപ്പ് നല്കിയിരുന്നു.
വരുന്നത് റഷ്യയില് നിന്നും കാനഡയില് നിന്നും
നിലവില് റഷ്യയില് നിന്നും കാനഡയില് നിന്നും ക്വിന്റലിന് ഏകദേശം 3000 രൂപ - 3400 രൂപ നിരക്കിലാണ് പരിപ്പ് ഇറക്കുമതി ചെയ്യുന്നത്. ഇറക്കുമതി ചെയ്യുന്ന പരിപ്പിന്റെ വില, മറ്റ് പയറുവര്ഗങ്ങളുടെ വിപണി വിലയേക്കാള് 50% വരെ കുറവായിരുന്നു.
എന്തിനാണ് തീരുവ ഒഴിവാക്കിയത്?
2023-24 വിള വര്ഷത്തില് (ജൂലൈ-ജൂണ്) ഉത്പാദനം 12.26 ദശലക്ഷം ടണ്ണില് നിന്ന് 11 ദശലക്ഷം ടണ് ആയി കുറഞ്ഞതിനെ തുടര്ന്ന് ആഭ്യന്തര വിതരണം മെച്ചപ്പെടുത്തുന്നതിനാണ് 2023 ഡിസംബറില് സര്ക്കാര് പരിപ്പിന്റെ തീരുവ ഒഴിവാക്കിയത്. ഈ ഇളവ് പിന്നീട് പലതവണ നീട്ടി നല്കിയിരുന്നു. 2024-25 കാലയളവില്, ആകെ പയറുവര്ഗ്ഗ ഇറക്കുമതിയില് 29.5% വും പരിപ്പായിരുന്നു നിലവില് ഏകദേശം 4 ദശലക്ഷം ടണ് പരിപ്പ് 2023 ഡിസംബര് മുതല് ഇറക്കുമതി ചെയ്തിട്ടുണ്ടെന്നാണ് കണക്ക്. ഏകദേശം 0.3 ദശലക്ഷം ടണ് പരിപ്പ് കാനഡയില് നിന്ന് വന്നുകൊണ്ടിരിക്കുകയാണെന്നും വ്യാപാര മേഖലയിലുള്ളവര് പറയുന്നു.