ട്രംപിന്റെ താരിഫുകള്‍ തിരിച്ചടിക്കുന്നു; ജപ്പാന്റെ കയറ്റുമതി വീണ്ടും ഇടിഞ്ഞു, വ്യാപാരക്കരാര്‍ ആശങ്കയില്‍

ജപ്പാനുമായി ഒരു വലിയ കരാറില്‍ ഉടന്‍ എത്തുമെന്ന് താന്‍ കരുതുന്നില്ലെന്ന് ട്രംപ്

അമേരിക്കന്‍ താരിഫുകള്‍ സാമ്പത്തിക മാന്ദ്യത്തിലേക്ക് നയിക്കുമെന്ന ആശങ്കകള്‍ക്കിടെ, ജപ്പാന്റെ കയറ്റുമതി ജൂണില്‍ വീണ്ടും ഇടിഞ്ഞു. മെയ് മാസത്തില്‍ 1.7% കുറഞ്ഞതിനു പിന്നാലെയാണ് ജൂണില്‍ 0.5% ഇടിവ് രേഖപ്പെടുത്തിയത്.സാമ്പത്തിക വിദഗ്ധര്‍ 0.5% വര്‍ദ്ധനവ് പ്രതീക്ഷിച്ചിരുന്ന സ്ഥാനത്താണ് ഈ തിരിച്ചടി. അമേരിക്കയിലേക്കുള്ള കയറ്റുമതിയില്‍ 11.4% ഇടിവുണ്ടായപ്പോള്‍, ചൈനയിലേക്കുള്ള കയറ്റുമതി 4.7% കുറഞ്ഞു. ആഗസ്റ്റ് 1 മുതല്‍ ജപ്പാന്റെ കയറ്റുമതിക്ക് 25% അധിക താരിഫ് ഏര്‍പ്പെടുത്താനാണ് അമേരിക്കയുടെ തീരുമാനം. ഒരു വ്യാപാര കരാറില്‍ ഇരുപക്ഷവും എത്താത്തപക്ഷം ഇത് നടപ്പിലാകും. എങ്കിലും, പെട്ടെന്നൊരു കരാറിനുള്ള പ്രതീക്ഷകള്‍ മങ്ങിക്കൊണ്ടിരിക്കുകയാണ്. ജപ്പാനുമായി ഒരു വലിയ കരാറില്‍ ഉടന്‍ എത്തുമെന്ന് താന്‍ കരുതുന്നില്ലെന്ന് ട്രംപ് പറഞ്ഞിരുന്നു. ജപ്പാന്റെ താല്‍പ്പര്യങ്ങളെ ഹനിക്കുന്ന യാതൊരു വിട്ടുവീഴ്ചയ്ക്കും തന്റെ ഭരണകൂടം തയ്യാറല്ലെന്ന് പ്രധാനമന്ത്രി ഷിഗേരു ഇഷിബ ആവര്‍ത്തിച്ചു വ്യക്തമാക്കിയിട്ടുണ്ട്.

വ്യാപാര കരാറുമായി ബന്ധപ്പെട്ട പ്രധാന തര്‍ക്ക വിഷയങ്ങളിലൊന്ന് ജാപ്പനീസ് കാര്‍ കയറ്റുമതിയിലുള്ള താരിഫുകളാണ്. ഏപ്രില്‍ 3 മുതല്‍ അമേരിക്ക ജാപ്പനീസ് വാഹനങ്ങള്‍ക്ക് 25% താരിഫ് ഇതിനോടകം ഏര്‍പ്പെടുത്തിയിട്ടുണ്ട്. ഇത് അമേരിക്കയിലേക്കുള്ള ജപ്പാന്റെ മൊത്തം കയറ്റുമതിയുടെ ഏകദേശം 30% വരും. കാറുകള്‍, ബസുകള്‍, ട്രക്കുകള്‍ എന്നിവ ഉള്‍പ്പെടുന്ന വാഹനങ്ങളുടെ അമേരിക്കയിലേക്കുള്ള കയറ്റുമതി ജൂണില്‍ 26.7% കുറഞ്ഞു. മെയ് മാസത്തില്‍ ഇത് 24.7% ആയിരുന്നു. എന്നിരുന്നാലും, കാര്‍ കയറ്റുമതിയുടെ അളവ് കഴിഞ്ഞ വര്‍ഷം ഇതേ മാസത്തെ അപേക്ഷിച്ച് 4.6% വര്‍ദ്ധിച്ചു. ഇത് വിപണി വിഹിതം നിലനിര്‍ത്താന്‍ ജാപ്പനീസ് കയറ്റുമതിക്കാര്‍ അമേരിക്കന്‍ ഉപഭോക്താക്കള്‍ക്ക് വലിയ കിഴിവുകള്‍ നല്‍കുന്നതുകൊണ്ടാണെന്നാണ് സൂചന.

അമേരിക്കന്‍ കാര്‍ഷിക ഉല്‍പ്പന്നങ്ങള്‍ സ്വീകരിക്കാനും ജപ്പാന്‍ തയ്യാറാകണമെന്ന് അമേരിക്ക ആവശ്യപ്പെടുന്നുണ്ട്, എന്നാല്‍ ഭരണകക്ഷിയായ ലിബറല്‍ ഡെമോക്രാറ്റിക് പാര്‍ട്ടി ഇതിനോട് എതിര്‍പ്പ് പ്രകടിപ്പിച്ചിട്ടുണ്ട്. കാറുകള്‍, സ്റ്റീല്‍, അലുമിനിയം എന്നിവയ്ക്ക് പുറമേയുള്ള പുതിയ തീരുവകള്‍ ജപ്പാന്റെ മൊത്ത ആഭ്യന്തര ഉത്പാദനത്തില്‍ നിന്ന് 1% ഇല്ലാതാക്കാന്‍ സാധ്യതയുണ്ടെന്ന് മൂഡീസ് അനലിറ്റിക്‌സ് വ്യക്തമാക്കി.