കോലാപുരി ചെരുപ്പ് വിവാദം: മറുപടിയുമായി പ്രാഡ, നിയമനടപടിക്ക് ഒരുങ്ങി മഹാരാഷ്ട്ര

ഇന്ത്യൻ കരകൗശല വിദഗ്ധരെയും പാരമ്പര്യത്തെയും അംഗീകരിക്കുന്നതിൽ പ്രാഡ പരാജയപ്പെട്ടതിനെ തുടർന്ന് സോഷ്യൽ മീഡിയയിൽ കടുത്ത വിമർശനം ഉയർന്നിരുന്നു.

പരമ്പരാഗത ഇന്ത്യൻ പാദരക്ഷയായ കോലാപുരി ചെരുപ്പിന്റെ ഡിസൈൻ തങ്ങളുടെ പുതിയ ശേഖരത്തിൽ ഉപയോഗിച്ചതുമായി ബന്ധപ്പെട്ട് ഉയർന്ന വിവാദത്തിൽ പ്രതികരണവുമായി ഇറ്റാലിയൻ ആഢംബര ഫാഷൻ ഹൗസായ പ്രാഡ . മിലാനിൽ നടന്ന 2026 ലെ സ്പ്രിംഗ് സമ്മർ പുരുഷന്മാരുടെ വസ്ത്ര ശേഖരത്തിൽ പ്രദർശിപ്പിച്ച ചെരുപ്പുകൾ ഇന്ത്യയിലെ മഹാരാഷ്ട്രയിലെയും കർണാടകയിലെയും പരമ്പരാഗത ഇന്ത്യൻ പാദരക്ഷകളിൽ നിന്ന് പ്രചോദനം ഉൾക്കൊണ്ടതാണെന്ന് പ്രാഡ സമ്മതിച്ചു. അതേസമയം, പ്രാഡക്കെതിരെ നിയമനടപടിക്ക് ഒരുങ്ങുകയാണ് മഹാരാഷ്ട്ര സർക്കാർ.

പ്രാഡയുടെ വിശദീകരണം തങ്ങൾ കരകൗശലത്തെയും പാരമ്പര്യത്തെയും ഡിസൈൻ ശൈലികളെയും പ്രോത്സാഹിപ്പിക്കുന്നുണ്ടെന്ന് പ്രാഡ നൽകിയ മറുപടിയിൽ അറിയിച്ചു. മിലാൻ ഷോയിൽ ഡിസൈനിന് പിന്നിലെ ഇന്ത്യൻ കരകൗശല വിദഗ്ധരെയും പാരമ്പര്യത്തെയും അംഗീകരിക്കുന്നതിൽ പ്രാഡ പരാജയപ്പെട്ടതിനെ തുടർന്ന് സോഷ്യൽ മീഡിയയിൽ കടുത്ത വിമർശനം ഉയർന്നിരുന്നു.

മഹാരാഷ്ട്ര സർക്കാരിന്റെ നീക്കം കൊൽഹാപുരി ചെരുപ്പുകൾക്ക് ഭൗമസൂചിക അവകാശം കർണാടകയിലെ ലെതർ ഇൻഡസ്ട്രീസ് ഡവലപ്പ്മെന്റ് കോർപറേഷൻ ലിമിറ്റഡി നൊപ്പം സംയുക്തമായി കൈവശം വെക്കുന്ന മഹാരാഷ്ട്രയിലെ സർക്കാർ ഉടമസ്ഥതയിലുള്ള ലെതർ ഡെവലപ്‌മെന്റ് കോർപ്പറേഷനായ സന്ത് രോഹിദാസ് ലെതർ ഇൻഡസ്ട്രീസ് & ചർമ്മാകർ ഡെവലപ്‌മെന്റ് കോർപ്പറേഷൻ നിയമപരമായ നടപടികൾ ആലോചിക്കുകയാണ്. പ്രാഡ പ്രദർശിപ്പിച്ച തുറന്ന കാലുകളുള്ള ലെതർ ചെരുപ്പ്, മഹാരാഷ്ട്രയിലും കർണാടകയിലും തലമുറകളായി കൈകൊണ്ട് നിർമ്മിക്കുന്ന പരമ്പരാഗത ലെതർ പാദരക്ഷകളുമായി അടുത്ത സാമ്യം പുലർത്തുന്നുണ്ട്.ഇന്ത്യൻ നിയമപ്രകാരം, രജിസ്റ്റർ ചെയ്ത ഉടമകൾക്കും അംഗീകൃത ഉപയോക്താക്കൾക്കും ഇന്ത്യയിൽ നിയമനടപടികൾ ആരംഭിക്കാൻ അർഹതയുണ്ടെങ്കിലും, നിലവിൽ ജിഐ അടയാളങ്ങൾക്ക് അതിർത്തി കടന്നുള്ള നിയമപരമായ സംരക്ഷണം ലഭ്യമല്ല.

2018 ഡിസംബർ 11-നാണ് കോലപുരി ചെരുപ്പുകൾക്ക് ജിഐ പദവി ലഭിച്ചത്. മഹാരാഷ്ട്രയിലെയും കർണാടകയിലെയും നാല് വീതം ജില്ലകൾ ഉൾപ്പെടെ എട്ട് ജില്ലകളെ ഇത് ഉൾക്കൊള്ളുന്നു. ഈ കരകൗശല വ്യവസായത്തിന് വലിയ വ്യാപ്തി ഉണ്ടായിരുന്നിട്ടും, 95 കരകൗശല വിദഗ്ധർക്ക് മാത്രമേ അംഗീകൃത ജി ഐ ഉപയോക്താക്കളായി രജിസ്റ്റർ ചെയ്യാൻ കഴിഞ്ഞിട്ടുള്ളൂ.