പുതുപ്പള്ളി കാടാമുറി നരസിംഹക്ഷേത്രത്തിന് പുറക് വശത്തെ വീട്ടിൽ താമസിക്കുന്ന രാമൻനായർ നാട്ടുകാരുടെ കുഞ്ഞമ്മാവനാണ്.
കോട്ടയം: കഴിഞ്ഞ ദിവസമാണ് ലോക മുത്തച്ചൻ മസാസോ നൊനാക്ക ഈ ലോകത്തോട് വിട പറഞ്ഞത്. 113 വയസ്സായിരുന്നു മസാസോ നൊനാക്കയ്ക്ക്. നമ്മള്‍ മലയാളികള്‍ക്കുമുണ്ട് ഇതുപോലൊരു മുത്തച്ചൻ. കോട്ടയത്തുകാരനായ പുതുപ്പള്ളി എറികാട് രാമൻനായര്‍. വയസ്സ് 110 ആണ് രാമന്‍ നായര്‍ക്ക്.
പുതുപ്പള്ളി കാടാമുറി നരസിംഹക്ഷേത്രത്തിന് പുറക് വശത്തെ വീട്ടിൽ താമസിക്കുന്ന രാമൻനായർ നാട്ടുകാരുടെ കുഞ്ഞമ്മാവനാണ്. ഓർമ്മക്കുറവും നടക്കാൻ പ്രയാസവുമൊഴിച്ചാല്‍ മറ്റ് അസുഖങ്ങളൊന്നുമില്ല. 1909 ഫെബ്രുവരി 22നാണ് രാമൻനായരുടെ ജനനമെന്നാണ് ആധാരത്തിൽ രേഖപ്പെടുത്തിയിരിക്കുന്നത്. ഈ കണക്ക് പ്രകാരം വരുന്ന ഫെബ്രുവരി 22ന് 110 വയസ് തികയും.
പഴയകാര്യങ്ങൾ പലതും മറന്ന് പോയിട്ടുണ്ടെങ്കിലും ചിലത് ഒളിമങ്ങാതെ നിൽക്കുന്നുണ്ട്. ഉമ്മൻചാണ്ടിയുടെ അച്ഛന്റ അച്ഛനുമായി പ്രവർത്തിച്ച ഓർമ്മ രാമൻനായർക്ക് ഇപ്പോഴുമുണ്ട്. കർഷകനായിരുന്ന രാമൻനായരുടെ പ്രധാനവിനോദം ചീട്ടുകളിയാണ്. രാമന്‍നായരുടെ 110-ാം ജന്മദിനം ആഘോഷമാക്കാനാണ് ബന്ധുക്കളുടെ തീരുമാനം.