19കാരിയെ കൂട്ടബലാത്സംഗത്തിനിരയാക്കിയ മൂന്ന്​ പേർ പിടിയിൽ

ലക്​നൗ: പത്തൊമ്പതുകാരിയെ കൂട്ടബലാത്സംഗത്തിനിരയാക്കുകയും വെടിവെച്ച്​ പരുക്കേൽപ്പിക്കുകയും ചെയ്​ത സംഭവത്തിൽ മൂന്ന്​ പേരെ പൊലീസ്​ അറസ്​റ്റ്​ ചെയ്​തു. കരൺ, ഗോലു, മുകേഷ്​ എന്നിവരാണ്​ പിടിയിലായത്​. സന്ദീപ്​, രോഹിത്​ എന്നിവർക്കെതിരെ ഇരയായ പെൺകുട്ടിയുടെ ബന്ധുക്കൾ പരാതി നൽകുകയും ചെയ്​തിട്ടുണ്ടെന്ന്​ റൂറൽ പൊലീസ്​ സൂപ്രണ്ട്​ സതീഷ്​ കുമാർ പറഞ്ഞു.  രാജ്യത്ത്​ സ്​ത്രീകൾക്കെതിരായ അതിക്രമങ്ങൾ വർധിച്ചുവരുന്ന യു.പിയിലെ സംഭവ പരമ്പരകളിലെ ഒടുവിലത്തേതാണ്​ ഇത്​. മൂക്കിൽ പരിക്കേറ്റ യുവതിയുടെ നില ഗുരുതരമല്ല. ബുധനാഴ്​ച രാത്രിയാണ്​ സംഭവം. പ്രാഥമിക കൃത്യം നിർവഹിക്കാനായി ലക്​​നോവി​ന്‍റെ പ്രാന്തപ്രദേശമായ മലിഹാബാദ്​ വില്ലേജിലെ വീടിന്​ പുറത്തിറങ്ങിയതായിരുന്നു യുവതി.

വീട്ടിൽ തന്നെ ടോയ്​ലറ്റ്​ സ്​ഥാപിക്കാൻ ​സർക്കാർ നിർബന്ധിക്കു​മ്പോഴും ദശലക്ഷക്കണക്കിന്​ പേർ തുറസായ സ്​ഥലത്ത്​ പ്രാഥമിക കൃത്യം നിർവഹിക്കുകയും അതുവഴി ലൈംഗിക അതിക്രമങ്ങൾക്ക്​ വഴിവെക്കുന്നതായും പൊലീസ്​ പറയുന്നു. സ്ത്രീകൾക്കെതിരായ കുറ്റകൃത്യങ്ങൾ ഇല്ലാതാക്കുമെന്ന്​  ബിജെപിയുടെ തെരഞ്ഞെടുപ്പ്​ വാഗ്​ദാനമായിരുന്നു. മുഖ്യമന്ത്രി യോഗി ആദിത്യനാഥ്​ സ്​ത്രീകൾക്കെതിരായ അതിക്രമം തടയാൻ ലക്ഷ്യമിട്ട്​ നടപ്പിലാക്കിയ ആന്‍റി റോമിയോ സ്​ക്വാഡ്​ പ്രവർത്തനം സ്​ഥിതിഗതികൾ നേരിയ തോതിൽ മാറ്റംവരുത്താൻ ഇടയാക്കിയിരുന്നു.

ഒടുവിലത്തെ സംഭവത്തിൽ സന്ദീപ്​ തന്നെ കൂട്ട മാനഭംഗത്തിന്​ വിധേയനാക്കുകയായിരുന്നുവെന്ന്​ യുവതി പറയുന്നു. ഇരയായ പെൺകുട്ടിയുടെ സഹോദരനൊപ്പം സന്ദീപി​ന്‍റെെ സഹോദരി  ഒളിച്ചോടിയതിലുള്ള പ്രതികാരം എന്ന നിലയിലാണ്​ ഇയാളുടെ കൃത്യം എന്നാണ്​ പൊലീസ്​ ഭാഷ്യം. വെടിയൊച്ച കേട്ട്​ പുറത്തിറങ്ങിയപ്പോഴാണ്​ മകൾ ചോരവാർന്ന നിലയിൽ വീട്ടിൽ നിന്ന്​ 100 മീറ്റർ അകലെ കിടക്കുന്നതായി കണ്ടതെന്ന്​ അച്​ഛൻ പറയുന്നു.

ബൽറാംപൂർ ആശുപത്രിയിൽ ​പ്രവേശിപ്പിച്ച യുവതിയെ പിന്നീട്​ കിങ്​ ജോർജ്​ മെഡിക്കൽ യൂനിവേഴ്​സിറ്റി ട്രോമകെയറിലേക്ക്​ മാറ്റി. സംഭവം താൻ പൊലീസിൽ അറിയിക്കുമെന്ന്​ പറഞ്ഞപ്പോഴാണ്​ പ്രതികളിൽ ഒരാൾ തനിക്ക്​ നേരെ വെടിയുതിർത്തതെന്ന്​ യുവതി മൊഴി നൽകി. കൂട്ടമാനഭംഗത്തിനും കൊലപാതക ശ്രമത്തിനുമാണ്​ പൊലീസ്​ കേസെടുത്തത്​.