സൗദിയില്‍ വ്യാപാര സ്ഥാപനങ്ങള്‍ രാത്രി ഒമ്പത് മണിവരെ മാത്രം; നിയമം വരുന്നു

തൊഴില്‍ സാമൂഹിക കാര്യ മന്ത്രാലയമാണ് ഇത് സംബന്ധമായ കരട് നിയമം തയ്യാറാക്കി ഉന്നതാധികൃതര്‍ക്ക് സമര്‍പ്പിച്ചത്. കടകള്‍ രാത്രി ഒമ്പത് മണിക്ക് തന്നെ അടക്കണമെന്ന നിര്‍ദേശത്തെ കുറിച്ച് വിശദമായ പഠനം നടത്തിയതിനു ശേഷമാണ് നിര്‍ദേശത്തിനു അനുകൂലമായ നിയമം മന്ത്രാലയം തയ്യാറാക്കിയത്. 

നേരത്തെ ഇതുസംബന്ധമായ നിയമം മന്ത്രിസഭയ്ക്ക് സമര്‍പ്പിച്ചിരുന്നുവെങ്കിലും വിശദമായ പഠനത്തിനായി മന്ത്രിസഭ ഇത് തിരിച്ചയക്കുകയായിരുന്നു. ഉണ്ണ ഉദ്യോഗസ്ഥരുമായും വ്യാപാരികളുമായും വിശദമായ ചര്‍ച്ചകളും ശില്‍പ്പശാലകളും നടത്തിയതിനു ശേഷമാണ് ഇപ്പോള്‍ ഭേതഗതികളോടെ വീണ്ടും കരട് നിയമം തയ്യാറാക്കിയത്. രാത്രി ഒമ്പത് മണിക്ക് തന്നെ കടകള്‍ അടയ്ക്കുന്ന നിയമത്തോടൊപ്പം രാത്രി നിസ്കാരത്തിനു കടകള്‍ അടക്കുന്ന സമയം അഞ്ചു മിനുട്ടാക്കി കുറയ്ക്കണമെന്ന് വ്യാപാരികള്‍ ആവശ്യപ്പെട്ടിരുന്നു. 

ഈ ആവശ്യത്തോട് മന്ത്രാലയം അനുകൂലമായി പ്രതികരിച്ചിരുന്നുവെങ്കിലും കരട് നിയമത്തില്‍ ഇത് സംബന്ധമായ വ്യവസ്ഥകള്‍ ഒന്നും ചേര്‍ത്തിട്ടില്ല എന്നാണു സൂചന. രാത്രി ഒമ്പത് മണിക്ക് ശേഷം പ്രവര്‍ത്തിക്കുന്ന വ്യാപാര സ്ഥാപനങ്ങള്‍ക്ക് പതിനായിരം റിയാല്‍ പിഴ ചുമത്താന്‍ നിയമം വ്യവസ്ഥ ചെയ്യുന്നു. 

കൂടാതെ സ്ഥാപനം ഏതാനും ദിവസം അടച്ചു പൂട്ടുകയും ചെയ്യും. മക്കയിലും മദീനയിലുമുള്ള സ്ഥാപനങ്ങള്‍ക്ക് ഈ നിയമം ബാധകമാകില്ല. പാര്‍ക്കുകള്‍, റസ്റ്റോറന്റുകള്‍ തുടങ്ങിയവക്കും നിയമത്തില്‍ ഇളവ് അനുവദിക്കും. സ്വദേശികള്‍ക്കും വനിതകള്‍ക്കും ഈ മേഖലയില്‍ ജോലി ചെയ്യാന്‍ അവസരം ഒരുക്കുക എന്നതാണ് ഈ നിയമഭേതഗതിയുടെ പ്രധാനപ്പെട്ട ലക്ഷ്യം.