എറണാകുളം: എബിവിപി നടത്തിയ വിദ്യാഭ്യാസബന്ദിനെ തുടര്‍ന്ന് കൊച്ചിയില്‍ പ്രവര്‍ത്തകര്‍ കോളേജ് ബസുകള്‍ തടഞ്ഞ് വിദ്യാര്‍ത്ഥികളെ ഇറക്കി വിട്ടു. പ്രഫഷണല്‍ കോളേജുകളില്‍ നിന്നടക്കമുള്ള വിദ്യാര്‍ത്ഥികള്‍ കോളേജിലെത്താനാകാതെ വലഞ്ഞു
കലൂര്‍ കടവന്ത്ര റോഡിലാണ് രാവിലെ എബിവിപി പ്രവര്‍ത്തകര്‍ ബസുകള്‍ തടഞ്ഞു തുടങ്ങിയത്. പിന്നീടത് കലൂര്‍ ജംഗ്ഷനിലേക്ക് മാറ്റി. ബസുകള്‍ തടഞ്ഞ പ്രവര്‍ത്തകര്‍ വിദ്യാര്‍ത്ഥികളെ പുറത്തിറക്കി. ബസുകള്‍ വിട്ടുപോയതോടെ കോളേജിലെത്താനാകാതെ കുട്ടികള്‍ വലഞ്ഞു.
പിന്നീട് സ്വകാര്യ ബസുകളില്‍ കയറിയും, ബന്ധുക്കളെ വിളിച്ചു വരുത്തിയുമാണ് കുട്ടികള്‍ കോളേജിലേക്ക് പോയത്. രാവിലെ എട്ട് മണിക്ക് തുടങ്ങിയ സമരം അവസാനിപ്പിച്ച് പ്രവര്‍ത്തകര്‍ നേരേ പൊയത് സെന്റ് അല്‍ബര്‍ട്‌സ് കോളേജിലേക്കാണ്. കേളേജിനകത്ത് കയറി ക്ലാസ് തടയാന്‍ ശ്രമിച്ചെങ്കിലും പോലീസെത്തി എബിവിപി പ്രവര്‍ത്തകരെ അറസ്റ്റ് ചെയ്ത് നീക്കി.