ടൈല്‍ പണിക്ക് ക്യാമ്പ് ഫോളോവര്‍മാരെ ഉപയോഗിച്ചു; പി.വി.രാജുവിനെതിരെ നടപടി

പൊലീസിലെ ദാസ്യപ്പണിയില്‍ നടപടി പി.വി. രാജുവിനെ സ്ഥലം മാറ്റി

തിരുവനന്തപുരം: ഡെപ്യൂട്ടി കമാന്‍ഡന്‍റ് പി.വി. രാജുവിനെതിരെ നടപടി. തിരുവനന്തപുരം എസ്എപി ക്യാമ്പില്‍ നിന്ന് തൃശൂരിലേക്ക് സ്ഥലം മാറ്റി. ക്യാമ്പ് ഫോളോവേഴ്സിനെ കൊണ്ട് വീട്ടിലെ ടൈല്‍സ് പണി ചെയ്യിച്ചത് വിവാദമായിരുന്നു.

പി.വി. രാജുവിന്റെ വീട്ടിൽ ടൈൽ പണിക്കും കോൺക്രീറ്റ് പണിക്കും നാല് ക്യാമ്പ് ഫോളോവർമാരെ ഉപയോഗിച്ചുവെന്നാണ് സംസ്ഥാന പൊലീസ് മേധാവിക്ക് ലഭിച്ച പരാതി. വീട്ടിൽ ജോലി ചെയ്യുന്ന സമയത്തും ഹാജർബുക്കിൽ ഒപ്പിടുവിച്ചത്. രേഖകളും ദൃശ്യങ്ങളും സഹിതമാണ് പരാതി ലഭിച്ചത്.

ജോലിക്ക് വീട്ടിലെത്തിച്ചവർക്ക് ഭക്ഷണമോ കൂലിയോ നൽകിയിരുന്നില്ലെന്നും ക്യാമ്പ് ഫോളോവർമാർ ഏഷ്യാനെറ്റ് ന്യൂസിനോട് മുന്‍പ് വെളിപ്പെടുത്തിയിരുന്നു.  അഴിമതി ആരോപണത്തിൽ വിജിലൻസ് അന്വേഷണം നേരിടുന്ന ഉദ്യോഗസ്ഥനാണ് പി.വി. രാജു. മറൈൻ എൻഫോഴ്സിലായിരുന്ന സമയത്ത് മണ്ണെണ്ണ വെട്ടിച്ചുവെന്നതാണ് ഇദ്ദേഹത്തിനെതിരായ കേസ്.