മൂന്ന് പതിറ്റാണ്ടിന് ശേഷം ​ഗീർ വനത്തിൽ കടുവയുടെ സാന്നിദ്ധ്യം

കടുവ നടന്നു പോകുന്നതിന്റെ ദൃശ്യങ്ങൾ സ്ഥലത്തെ സിസിടിവി ദൃശ്യങ്ങളിൽ കണ്ടതായി അദ്ദേഹം വെളിപ്പെടുത്തുന്നു. സിംഹങ്ങളെ കാണപ്പെടുന്ന സ്വാഭാവിക വനപ്രദേശമായ ​ഗീർവനത്തിൽ 1989 ലാണ് അവസാനമായി കടുവയെ കണ്ടത്.   

ഗുജറാത്ത്: മൂന്ന് പതിറ്റാണ്ടിന് ശേഷം ​ഗുജറാത്തിലെ ​ഗീർ വനങ്ങളിൽ കടുവയെ കണ്ടെത്തിയതായി റിപ്പോർട്ട്. മഹിസാ​ഗർ ജില്ലയിൽ റോഡിലൂടെ  കടുവ നടന്നു പോകുന്നതായി വഴിപോക്കനായ ഒരാൾ കണ്ടതായി സാക്ഷ്യപ്പെടുത്തുന്നു. സംസ്ഥാന വനംവകുപ്പ് മന്ത്രി ​ഗണപത് വാസവ് സംഭവം സ്ഥിരീകരിച്ചിട്ടുണ്ട്. കടുവ നടന്നു പോകുന്നതിന്റെ ദൃശ്യങ്ങൾ സ്ഥലത്തെ സിസിടിവി ദൃശ്യങ്ങളിൽ കണ്ടതായി അദ്ദേഹം വെളിപ്പെടുത്തുന്നു. സിംഹങ്ങളെ കാണപ്പെടുന്ന സ്വാഭാവിക വനപ്രദേശമായ ​ഗീർവനത്തിൽ 1989 ലാണ് അവസാനമായി കടുവയെ കണ്ടത്. 

നാലുവർഷത്തിലൊരിക്കൽ ഇവിടെ കടുവയുടെ സാന്നിദ്ധ്യമുണ്ടോ എന്നറിയാനായി കേന്ദ്ര സർക്കാർ കണക്കെടുപ്പ് നടത്തിയിരുന്നു. മഹിസാ​ഗർ ജില്ലയിലെ ഭോരിയ ​​ഗ്രാമത്തിലെ അധ്യാപകനാണ് കഴിഞ്ഞയാഴ്ച റോഡിൽ വച്ച് കടുവയെ കണ്ടത്. തന്റെ മൊബൈലിൽ ഈ ദൃശ്യങ്ങൾ പകർത്തി സോഷ്യൽ മീഡിയയിൽ അദ്ദേഹം പോസ്റ്റ് ചെയ്തിരുന്നു. ഈ ചിത്രങ്ങൾ വൈറലായതിനെ തുടർന്നാണ് വനംവകുപ്പ് ഈ പ്രദേശത്ത് സിസിടിവി ക്യാമറകൾ സ്ഥാപിച്ചത്.

അയൽസംസ്ഥാനങ്ങളായ രാജസ്ഥാൻ, മധ്യപ്രദേശ്, മഹാരാഷ്ട്ര എന്നിവിടങ്ങളിൽ നിന്നാകാം കടുവ എത്തിയതെന്ന് കരുതപ്പെടുന്നു. മധ്യപ്രദേശിലെ ഉജ്ജയിനിൽ നിന്ന് കടുവയെ കാണാതായതായി റിപ്പോർട്ടുണ്ട്. ഈ പ്രദേശത്ത് കടുവയെ കണ്ടെത്തിയെന്ന കാര്യം ഉറപ്പാണെന്നും ഇവിടെ കടുവകൾക്ക് വാസയോ​ഗ്യമാണോ എന്ന വസ്തുത പരിശോധിക്കുമെന്നും വനംമന്ത്രി വ്യക്തമാക്കി. മാത്രമല്ല, വേറെയും കടുവകൾ ഈ പ്രദേശത്തുണ്ടോ എന്നും കൂടുതൽ പരിശോധന നടത്തും.