​ഗാസിപൂരിലെ പൊലിസ് ഉദ്യോ​ഗസ്ഥന്റെ കൊലപാതകം; യോ​ഗി ആദിത്യനാഥിനെതിരെ അഖിലേഷ് യാദവ്

ഉത്തർപ്രദേശ് സർക്കാരിന് അറിയാവുന്നത് അക്രമത്തിന്റെ ഭാഷയാണെന്നും അതിനാലാണ് ഇത്തരം സംഭവങ്ങൾ നടക്കുന്നതെന്നുമായിരുന്നു അഖിലേഷിന്റെ വിമർശനം. വേദിയിലും പൊതുയോ​ഗത്തിലും സംസാരിക്കുമ്പോൾ യോ​ഗി ആദിത്യനാഥ് ഉപയോ​ഗിക്കുന്നത് അക്രമത്തിന്റെ ഭാഷയാണെന്നും അദ്ദേഹം കൂട്ടിച്ചേർത്തു. 

ഉത്തർപ്രദേശ്: ​ഗാസിപൂരിൽ നടന്ന ആൾക്കൂട്ട ആക്രമണത്തിന്റെ കല്ലേറിൽ‌ പൊലിസ് ഉദ്യോ​ഗസ്ഥൻ കൊല്ലപ്പെട്ട സംഭവത്തിൽ മുഖ്യമന്ത്രി യോ​ഗി ആദിത്യനാഥിനെതിരെ സമാജ് വാദി പാർട്ടി നേതാവ് അഖിലേഷ് യാദവ്. ഉത്തർപ്രദേശ് സർക്കാരിന് അറിയാവുന്നത് അക്രമത്തിന്റെ ഭാഷയാണെന്നും അതിനാലാണ് ഇത്തരം സംഭവങ്ങൾ നടക്കുന്നതെന്നുമായിരുന്നു അഖിലേഷിന്റെ വിമർശനം. വേദിയിലും പൊതുയോ​ഗത്തിലും സംസാരിക്കുമ്പോൾ യോ​ഗി ആദിത്യനാഥ് ഉപയോ​ഗിക്കുന്നത് അക്രമത്തിന്റെ ഭാഷയാണെന്നും അദ്ദേഹം കൂട്ടിച്ചേർത്തു. ഈ അക്രമത്തിന്റെ കാരണം യോ​ഗി ആദിത്യനാഥാണെന്നും അദ്ദേഹം രൂക്ഷഭാഷയിൽ വിമർശിച്ചു. 

കൊല്ലപ്പെട്ട പൊലിസ് ഉദ്യോ​ഗസ്ഥൻ സുരേഷ് വത്സിന്റെ മകനും വിമർശനവുമായി രം​ഗത്തെത്തിയിരുന്നു. സ്വന്തം സഹപ്രവർത്തകരുടെ ജീവൻ  സം​രക്ഷിക്കാൻ കഴിയാത്ത പൊലിസ് ഉദ്യോ​ഗസ്ഥർ എങ്ങനെ ജനങ്ങളെ സംരക്ഷിക്കുമെന്നായിരുന്നു  സുരേഷിന്റെ മകന്റെ ചോദ്യം. ഇത്തരം സംഭവങ്ങൾ ആവർത്തിക്കുകയാണെന്നും അദ്ദേഹം കൂട്ടിച്ചേർത്തു. കൊലപാതകവുമായി ബന്ധപ്പെട്ട് ഇതുവരം 11 പേരെ അറസ്റ്റ് ചെയ്തതായി പൊലിസ് അറിയിച്ചു. 

ഈ മാസം ഉത്തർപ്രദേശിൽ ആൾക്കൂട്ട ആക്രമണത്തിൽ കൊല്ലപ്പെടുന്ന രണ്ടാമത്തെ പൊലിസ് ഉദ്യോ​ഗസ്ഥനാണ് സുരേഷ് വത്സ്. ബുലന്ദ്ഷഹറിൽ നടന്ന കലാപത്തിൽ സമാനമായ സാഹചര്യത്തിൽ സു​ബോധ് കുമാർ എന്ന പൊലിസ് ഉദ്യോ​ഗസ്ഥനും കൊല്ലപ്പെട്ടിരുന്നു. സുരേഷിന്റെ ഭാര്യയ്ക്ക് 40 ലക്ഷവും മാതാപിതാക്കൾക്ക് 10 ലക്ഷം രൂപയും മുഖ്യമന്ത്രി സഹായധനം പ്രഖ്യാപിച്ചിട്ടുണ്ട്.