കൊച്ചിയിൽ ബാങ്ക് ചുമർ കുത്തി തുരന്ന് കവർച്ചാ ശ്രമം

കൊച്ചി: എറണാകുളത്ത് ബാങ്ക് ചുമർ കുത്തി തുരന്ന് കവർച്ചാ ശ്രമം. കളമശ്ശേരിയിൽ പ്രവർത്തിക്കുന്ന ബാങ്ക് ഓഫ് ഇന്ത്യയിൽ  ഇന്നലെ രാത്രിയാണ് സംഭവം.  പോലീസ് കേസെടുത്ത് അന്വേഷണം തുടങ്ങി. 

കളമശ്ശേരി നഗരസഭാ ഓഫീസിന് മുന്നിൽ പ്രവർത്തിക്കുന്ന ബാങ്ക് ഓഫ് ഇന്ത്യയിലാണ് രാവിലെ ജീവനക്കാർ ചുമർ തുരന്ന നിലയിൽ കണ്ടെത്തിയത്. ഒരാൾക്ക് അകത്ത് കടക്കാൻ പാകത്തിൽ മുൻ ഭാഗത്തെ ചുമരുകൾ  കുത്തി പൊളിച്ചിരുന്നു. എന്നാൽ ഓഫീസിനക്ക് കവർച്ച സംഘം കയറിയതായി കരുതുന്നില്ല. ജീവനക്കാർ വിവരമറിയിച്ചതിനെ തുടർന്ന് പോലീസ് എത്തി ലോക്കർ  തുറന്ന് പരിശോധിച്ചെങ്കിലും പണമോ രേഖകളോ നഷ്ടമായിട്ടില്ലെന്ന് സ്ഥിരീകരിച്ചു.

ദേശീയ പാതയോട് ചേർന്ന് ഒന്നാം നിലയിലാണ് ബാങ്ക് പ്രവർത്തിക്കുന്നത്.  സംസ്ഥാനത്ത് ബാങ്ക് കവർച്ചകൾ കൂടിയപ്പോൾ എല്ലാ ബാങ്കുകളോടും   സുരക്ഷാ ജീവനക്കാരെ നിയമിക്കാൻ പോലീസ് നിർദ്ദേശിച്ചിട്ടുണ്ട്. എന്നാൽ കളമശ്ശേരി ബാങ്ക് ഓഫ് ഇന്ത്യ ബ്രാഞ്ചിന് സുരക്ഷാ ജീവനക്കാർ ഉണ്ടായിരുന്നില്ല.വരലടയാള വിദഗ്ധർ സ്ഥലത്തെത്തി പരിശോധന നടത്തി. കളമശ്ശേരി പോലീസ് കേസ് എടുത്ത് അന്വേഷണം തുടങ്ങി.