കോഴിക്കോട്ട് വീട്ടില്‍നിന്ന് 180 പവന്‍ സ്വര്‍ണം കവര്‍ന്നു

കൊട്ടാരം റോഡ് തച്ചേരിപറമ്പ് ആമിന അബ്ദുള്‍ സമദിന്റെ വീട്ടിലാണ് കവര്‍ച്ച നടന്നത്. വീട്ടില്‍ ആളില്ലാത്ത സമയത്തായിരുന്നു മോഷണം. ആമിന ഒറ്റക്കാണ് ഈ വീട്ടില്‍ താമസം. ഇവര്‍ രാത്രി തൊട്ടടുത്ത സഹോദരിയുടെ വീട്ടില്‍ പോയി ഉറങ്ങാറാണ് പതിവ്. കഴിഞ്ഞ ദിവസം രാത്രിയും ആമിന സഹോദരിയുടെ വീട്ടിലായിരുന്നു. ഈ സമയമാണ് കവര്‍ച്ച നടന്നതെന്ന് പൊലീസ് പറഞ്ഞു.
നൂറ്റി എണ്‍പത് പവന്‍ സ്വര്‍ണ്ണമാണ് കവര്‍ന്നത്. കഴിഞ്ഞ ദിവസം ബാങ്കില്‍ നിന്ന് എടുത്ത സ്വര്‍ണ്ണമാണിത്. വീടിന്റെ മുന്‍വാതില്‍ തകര്‍ത്താണ് മോഷ്ടാക്കള്‍ അകത്ത് കടന്നത്. പിന്നീട് കിടപ്പ് മുറിയിലെ അലമാരയില്‍ സൂക്ഷിച്ച സ്വര്‍ണ്ണം മോഷ്ടിക്കുകയായിരുന്നു. സിറ്റി പൊലീസ് കമ്മീഷണര്‍ ഉമ സ്ഥലത്തെത്തി അന്വേഷണം നടത്തി. നടക്കാവ് പൊലീസും സ്ഥലത്തെത്തി. ഡോഗ് സ്‌ക്വാഡും വിരലടയാള വിദഗ്ദരും സ്ഥലത്ത് പരിശോധന നടത്തിയിട്ടുണ്ട്. ഈ അടുത്ത കാലത്ത് കോഴിക്കോട് നഗരത്തില്‍ നടക്കുന്ന ഏറ്റവും വലിയ മോഷണമാണ് കൊട്ടാരം റോഡില്‍ നടന്നത്.