ഖനനം തടഞ്ഞ ദലിത്​ സ്​ത്രീകളെ ടിഡിപി പ്രവര്‍ത്തകര്‍ അടിച്ചുവീഴ്​ത്തി

ഹൈദരാബാദ്: വീടിനടുത്ത്​ ഖനനം തടഞ്ഞ ദലിത്​ സ്​ത്രീകളെ ടിഡിപി പ്രവര്‍ത്തകര്‍  അടിച്ചുവീഴ്​ത്തി. വിശാഖപട്ടണത്തിനടുത്ത്​ പെണ്ടുരുത്തി ജെറിപൊതുലപ്ലം എന്ന സ്​ഥലത്താണ്​ തെലുങ്കുദേശം പ്രവർത്തകരുടെ നേതൃത്വത്തിലുള്ള സംഘത്തിന്‍റെ മർദനത്തിന്​ രണ്ട്​ സ്​ത്രീകൾ ഇരയായത്​. മർദനത്തിനിരയായ ദുർഗാമ്മയും മാതാവ്​ അങ്കാമ്മയും പെണ്ടുരുത്തി പൊലീസിൽ പരാതി നൽകിയിട്ടുണ്ട്.

മർദനത്തിനിരയായ സ്​ത്രീകളുടെ സാരിയും ബ്ലൗസും കീറിയെറിയാൻ ശ്രമിച്ചതായും പരാതിയിൽ പറയുന്നു. ദൂർഗാമ്മയും കുടുംബവും കൃഷി ചെയ്യുന്ന ഭൂമിയിൽ പിന്നാക്ക ജാതിയിൽ നിന്നുള്ള ഏതാനും പേർ ഖനനം തുടങ്ങിയതാണ്​ സംഭവത്തിന്​ കാരണമെന്ന്​ പൊലീസ്​ അധികൃതർ പറയുന്നു. 

ഇൗ ഭൂമി പിന്നോക്ക വിഭാഗങ്ങൾക്കായുള്ള എൻ.ടി.ആർ ഭവന പദ്ധതിക്കായി സർക്കാർ നീക്കിവെച്ചിരുന്നു. എന്നാൽ ദലിത്​ കുടുംബങ്ങൾ നിലവിൽ താമസിച്ചുവരുന്നതാണ്​ ഇൗ ഭൂമി. ഭവന നിർമാണത്തിനായി ഭൂമി അനുവദിച്ചവർ ഇവിടെ എത്തി അടിത്തറ പണിയാൻ ഖനനം ആരംഭിച്ചതോടെ ദുർഗാമ്മയും അങ്കാമ്മയും എതിർത്തു. ഇത്​ തർക്കമാവുകയും മർദനത്തിൽ കലാശിക്കുകയുമായിരുന്നു.

പട്ടിക ജാതി/ വർഗ വിഭാഗങ്ങൾക്കെതിരായ അതിക്രമങ്ങൾ തടയുന്ന നിയമപ്രകാരം ഇരുവരുടെയും പരാതിയിൽ പൊലീസ്​ കേസെടുത്തിട്ടുണ്ട്​. മർദിച്ചവരുടെ രാഷ്​ട്രീയ ബന്ധങ്ങളും പൊലീസ്​ അന്വേഷിക്കുന്നുണ്ട്​.

പൊലീസ്​ കേസെടുക്കാൻ വൈകിയതിൽ ​പ്രതിഷേധിച്ച്​ ദലിത്​ സംഘടനകൾ പ്രതിഷേധവുമായി പൊലീസ്​ സ്​റ്റേഷന്​ മുന്നിൽ എത്തിയിരുന്നു. മർദനത്തിന്​ ഇരയായ സ്​ത്രീകളെ കിങ്​ ജോർജ്​ ആശുപത്രിയിൽ പ്രവേശിപ്പിച്ചു.