ഉത്തരകൊറിയയുമായി സംഘർഷത്തിന്​ സാധ്യതയുണ്ടെന്ന്​ ട്രംപ്

വാഷിങ്​ടൺ: ഉത്തരകൊറിയ മിസൈൽ, ആണവ പരീക്ഷണങ്ങൾ അവസാനിപ്പിച്ചില്ലെങ്കിൽ സംഘർഷത്തിന്​ സാധ്യതയുണ്ടെന്ന്​ അമേരിക്കൻ പ്രസിഡൻറ്​ ഡോണാൾഡ്​ ട്രംപ്​. പ്രസിഡൻറ്​ സ്ഥാനത്ത്​ എത്തയതി​ന്‍റെ നൂറാം ദിനത്തിൽ മാധ്യമ പ്രവർത്തകരോട്​ സംസാരിക്കുകയായിരുന്നു ട്രംപ്.

ഉത്തരകൊറിയയുമായുള്ള പ്രശ്​നം നയപരമായി പരിഹരിക്കാനാണ്​ ശ്രമമെന്നും എന്നാൽ അത്​ പ്രയാസകരമാണെന്നും ട്രംപ്​ പറഞ്ഞു. കൊറിയക്കെതിരെ സൈനിക നടപടി യു എസ്​ സർക്കാറി​ന്‍റെ പരിഗണനയിലില്ലെന്നും പുതിയ സാ​മ്പത്തിക ഉപരോധങ്ങൾ കൊറിയക്ക്​ മേൽ ചുമത്തുമെന്നും ട്രംപ്​ വ്യക്തമാക്കി.

കൊറിയൻ പ്രശ്​നം പരിഹരിക്കാനായി ചൈന നടത്തുന്ന ഇടപെടലുകളെ ട്രംപ്​ പുകഴ്​ത്തി. ചൈനയിലെ ജനങ്ങളെ സ്​നേഹിക്കുന്നതായും ട്രംപ്​ പറഞ്ഞു. കഴിഞ്ഞ മാസം ട്രംപ്​ ചൈനീസ്​ പ്രധാനമന്ത്രി ഷീ ജീംപിങുമായി കൂടികാഴ്​ച നടത്തിയിരുന്നു.