പരിക്ക്: ആരാധകര്‍ക്ക് ആശ്വാസവാര്‍ത്തയുമായി മാര്‍സലോ

പരിക്ക് സാരമുള്ളതല്ലെന്ന് ബ്രസീലിയന്‍ ഇതിഹാസം

മോസ്‌കോ: ആരാധകര്‍ക്ക് ആശ്വാസവാര്‍ത്തയുമായി ബ്രസീലിയന്‍ ഇതിഹാസം മാര്‍സലോ. ലോകകപ്പില്‍ സെര്‍ബിയക്കെതിരായ മത്സരത്തിലേറ്റ പരിക്ക് സാരമുള്ളതല്ലെന്ന് മാര്‍സലോ ട്വിറ്ററില്‍ കുറിച്ചു. മൈതാനത്ത് ഉടന്‍ തിരിച്ചെത്തുമെന്നും സെര്‍ബിയക്കെതിരെ വിജയിച്ചതില്‍ സന്തോഷമുണ്ടെന്നും ലെഫ്റ്റ് ബാക്ക് വ്യക്തമാക്കി. സെര്‍ബിയക്കെതിരെ കളി തുടങ്ങി 10 മിനുറ്റിനുള്ളില്‍ പരിക്കേറ്റ് മാര്‍സലോ പിന്‍മാറുകയായിരുന്നു. എന്നാല്‍ ഇടത് വിങിലൂടെ മിന്നലാക്രമണങ്ങള്‍ക്ക് നേതൃത്വം നല്‍കുന്ന മാര്‍സലോ മുഴുവന്‍ സമയം കളിക്കാതിരുന്നിട്ടും ബ്രസീല്‍ രണ്ട് ഗോളിന് സെര്‍ബിയയെ തകര്‍ത്തു. മെ‌ക്‌സിക്കോയ്ക്കെതിരായ പ്രീക്വാര്‍ട്ടറില്‍ മാര്‍സലോ ബൂട്ടണിയുമോ എന്നാണ് ഇനി അറിയേണ്ടത്. ലോകകപ്പില്‍ ബ്രസീലിന്‍റെ കിരീട പ്രതീക്ഷകള്‍ക്ക് ചുക്കാന്‍ പിടിക്കുന്ന താരങ്ങളിലൊരാളായ മാര്‍സലോ ലോകത്തെ മികച്ച അറ്റാക്കിങ് ലെഫ്റ്റ് ബാക്കായാണ് അറിയപ്പെടുന്നത്.