പെരുമ്പാവൂർ ന​ഗരത്തിൽ 2 വലിയ ട്രാവൽബാ​ഗുമായി 2 പേർ; കൈമാറുന്നതിനിടെ പിടികൂടി പൊലീസ്; 5 ലക്ഷം വിലയുളള കഞ്ചാവ്

ഖലീൽ മണ്ഡൽ ഒഡീഷയിൽ നിന്നും കൊണ്ടുവന്ന കഞ്ചാവ് സമീമിന് കൈമാറുന്നതിനിടയിലാണ് പിടിയിലായത്.

എറണാകുളം: പെരുമ്പാവൂരിൽ വിൽപ്പനയ്ക്കായി കൊണ്ടുവന്ന 5 ലക്ഷം രൂപയോളം വിലവരുന്ന കഞ്ചാവ് കൈമാറുന്നതിനിടെ രണ്ട് അതിഥി തൊഴിലാളികൾ പോലീസിന്റെ പിടിയിലായി. വെസ്റ്റ് ബംഗാൾ മുർഷിദാബാദ് റാണിനഗർ സ്വദേശി ഖലീൽ മണ്ഡൽ, മുർഷിദാബാദ് ഹരിബങ്ക സ്വദേശി സമീംഎന്നിവരാണ് പിടിയിലായത്. ഇവരിൽനിന്ന് 18.5 കിലോ കഞ്ചാവ് പോലീസ് പിടിച്ചെടുത്തു.

വലിയ രണ്ട് ട്രാവൽ ബാഗുകളിൽ, ചെറിയ പൊതികളിലായി സൂക്ഷിച്ച നിലയിലായിരുന്നു കഞ്ചാവ്. ഖലീൽ മണ്ഡൽ ഒഡീഷയിൽ നിന്നും കൊണ്ടുവന്ന കഞ്ചാവ് സമീമിന് കൈമാറുന്നതിനിടയിലാണ് പിടിയിലായത്. അതിഥി തൊഴിലാളികൾക്ക് വിൽപ്പന നടത്തുക എന്ന ലക്ഷ്യത്തോടെയാണ് ഇത്രയും അധികം കഞ്ചാവ് കൊണ്ടുവന്നത് എന്ന് പൊലീസ് അറിയിച്ചു.