തീവ്രവാദികളെ നേരിടുന്നത് പോലെ ജനങ്ങളെ നേരിടരുത്: ഗുലാംനബി ആസാദ്

ന്യൂഡൽഹി: കശ്മീരിൽ തീവ്രവാദികളെ നേരിടുന്നത് പോലെ ജനങ്ങളെ നേരിടരുതെന്ന് കോണ്‍ഗ്രസ് നേതാവ് ഗുലാംനബി ആസാദ്. പ്രതിഷേധക്കാർക്കു നേരെ പെല്ലറ്റ്​ ഗൺ ഉപയോഗിക്കരുതെന്നും ഗുലാംനബി ആസാദ്​ രാജ്യസഭയിൽ പറഞ്ഞു. തീവ്രവാദികളെ നേരിടുന്ന രീതിയിലാണ്​ കശ്​മീരിലെ സാധാരണക്കാരായ ജനങ്ങളെ സൈന്യം കൈകാര്യം ചെയ്യുന്നത്.  തീവ്രവാദം അവസാനിപ്പിക്കാനുള്ള സർക്കാർ നടപടിക്ക്​ കോണ്‍ഗ്രസ് പിന്തുണയുണ്ട്​. എന്നാൽ ജനങ്ങളെ ശത്രുസൈന്യത്തെപ്പോലെ നേരിടുന്നതിനെ പിന്തുണക്കുന്നി​ല്ല. കശ്​മീരിൽ നിലവിലെ സ്ഥിതി തൊണ്ണൂറുകളിലേതിനേക്കാൾ ഗുരുതരമാണ്​.

തെക്കൻ കശ്​മീരിലെ നാല്​ ജില്ലകളിൽ മാത്രം വൻതോതിൽ നാശനഷ്​ടമുണ്ടായി. നിരവധി പേര്‍ കൊല്ലപ്പെട്ടു. പത്തു ദിവസം കളഴിഞ്ഞും സംഘർഷാവസ്ഥ നിലനിൽക്കുന്നത്​ ജനങ്ങളുടെ മനസിൽ ആഴത്തിൽ മുറിവേറ്റതി​ന്‍റെ സൂചനയാണ്.  ബിജെപി കേന്ദ്ര സർക്കാറി​നെ കശ്​മീരിലെ ജനങ്ങൾ  അവിശ്വസിക്കുന്നുവെന്നും കോൺഗ്രസ്​ കേന്ദ്രം ഭരിച്ച കാലത്ത്  കശ്​മീരിലെ ​ജനങ്ങൾക്ക്​ സർക്കാരില്‍ വിശ്വാസമുണ്ടായിരുന്നെന്നും ഗുലാംനബി ആസാദ് പറഞ്ഞു.

അതേസമയം കശ്​മീരിൽ സംഘർഷം തുടരുകയാണെന്നും വിഘടനവാദികളും  രാജ്യവും തമ്മിലുള്ള യുദ്ധമാണ്​ നടക്കുന്നതെന്നും അരുൺ ജെയ്​റ്റ്​ലി മറുപടി പ്രസംഗത്തില്‍ പറഞ്ഞു.