വിവാഹത്തിന്​ മുമ്പ്​ ഉന്നതവിജയം നേടുന്ന മുസ്ലീം പെൺകുട്ടികൾക്ക്​ കേന്ദ്രത്തി​ന്‍റെ ഉപഹാരം 51000 രൂപ

ദില്ലി: വിവാഹത്തിന്​ മുമ്പ്​ ഉന്നത വിജയത്തോടെ ബിരുദപഠനം പൂർത്തിയാക്കുന്ന മുസ്ലീം പെൺകുട്ടികൾക്ക്​ നരേന്ദ്രമോദി സർക്കാറി​ന്‍റെ പ്രത്യേക ഉപഹാരം. 51000 രൂപയാണ്​ ഉപഹാരമായി നല്‍കുക. മൗലാന ആസാദ്​ ഫൗണ്ടേഷൻ മുന്നോട്ടുവെച്ച നിർദേശം കേന്ദ്ര ന്യൂനപക്ഷ മന്ത്രാലയം അംഗീകരിക്കുകയായിരുന്നു.

ന്യൂനപക്ഷങ്ങളെ ഉന്നതവിദ്യാഭ്യാസ രംഗത്ത്​ പ്രോൽസാഹിപ്പിക്കാൻ ലക്ഷ്യമിട്ട്​  ‘ഷാദി ഷാഗൂൺ’ എന്ന പേരിലാണ്​ പദ്ധതി നടപ്പാക്കുന്നത്​. ബീഗം ഹസ്രത്​ മഹൽ സ്കോളർഷിപ്പ്​ ലഭിക്കുന്ന എല്ലാവർക്കും പുതിയ പ്രോൽസാഹന പദ്ധതിക്കും അപേക്ഷിക്കാം. 2003ലാണ്​ ന്യൂനപക്ഷങ്ങളിലെ ദുർബല വിഭാഗങ്ങൾക്കായി പ്രത്യേക സ്കോളർഷിപ്പ്​ പദ്ധതി ആവിഷ്​ക്കരിച്ചത്​. നേരത്തെ 12-ാം ക്ലാസ്​ വരെ ഉന്നത വിജയം നേടുന്ന വിദ്യാർഥികൾക്കും സ്​​കോളർഷിപ്പ്​ ഏർപ്പെടുത്തിയിരുന്നു.

പദ്ധതി ബിരുദപഠനത്തിലേക്കും നീട്ടാൻ തീരുമാനിക്കുകയായിരുന്നു. മുസ്ലീം സമുദായത്തിൽ പെൺകുട്ടികളുടെ ബിരുദപഠനവും വിവാഹവും സംബന്ധിച്ച്​ ആശയക്കുഴപ്പം നിലനിൽക്കുന്നുവെന്ന വിലയിരുത്തലി​ന്‍റെ അടിസ്​ഥാനത്തിൽ കൂടിയാണ്​ കേന്ദ്രസർക്കാറി​ന്‍റെ പുതിയ പദ്ധതി.