വിവാഹ മണ്ഡപത്തില്‍വച്ച് വരനെ കൂട്ടുകാരന്‍ വെടിവച്ചുകൊന്നു

ഉത്തര്‍പ്രദേശില്‍ വിവാഹ മണ്ഡപത്തില്‍വച്ച് വരനെ അടുത്ത കൂട്ടുകാരന്‍ വെടിവച്ചുകൊന്നു

ഷാജഹന്‍പൂര്‍: ഉത്തര്‍പ്രദേശില്‍ വിവാഹ മണ്ഡപത്തില്‍വച്ച് വരനെ അടുത്ത കൂട്ടുകാരന്‍ വെടിവച്ചുകൊന്നു.  ഉത്തര്‍പ്രദേശിലെ ലഖിംപൂര്‍ ഖേരി ജില്ലയിലെ റാംപൂര്‍ ഗ്രാമത്തിലാണ് ഞെട്ടിപ്പിക്കുന്ന സംഭവം നടന്നത്. വരന്‍ വെടിയേറ്റ് നിലംപതിക്കുന്ന വീഡിയോ ചില ദേശീയ ചാനലുകള്‍ പുറത്തുവിട്ടിട്ടുണ്ട്. വരന്‍ സുനില്‍ റായി ആണ് വെടിയേറ്റ് കൊലചെയ്യപ്പെട്ടത്. വരന്‍റെ അടുത്ത സുഹൃത്തായ രാംചന്ദ്ര അന്വേഷണത്തിലാണ്.

രാംചന്ദ്ര തന്‍റെ കൈയ്യിലുളള ലൈസന്‍സ് തോക്കുപയോഗിച്ചാണ് വെടിവച്ചത്. ആദ്യം വെടിവച്ചെങ്കിലും അത് മിസായി. രണ്ടാമത്തെ ഉണ്ട കൃത്യമായി വരന്‍ സുനിലിന്‍റെ നെഞ്ചത്ത് പതിച്ചു. വെടിയേറ്റ സുനില്‍ നെഞ്ചത്ത് കൈവച്ച് താഴെ വീഴുകയായിരുന്നു. സുനിലിനെ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാന്‍ കഴിഞ്ഞില്ല. 

വിവാഹ ചടങ്ങ് നടക്കുന്ന സ്ഥലത്ത് ഉച്ചത്തില്‍ മ്യൂസിക് വച്ചിരുന്നു. ഈ ശബ്ദത്തില്‍ സുനിലിന് വെടിയേറ്റ ശബ്ദം കേള്‍ക്കാന്‍ കഴിഞ്ഞില്ലെന്നാണ് ബന്ധുക്കള്‍ പറയുന്നത്. വരന്‍റെ പിതാവ് നല്‍കിയ പരാതിയുടെ അടിസ്ഥാനത്തില്‍ പൊലീസ് കേസ് എടുത്തിട്ടുണ്ട്. വെടിവച്ച രാംചന്ദ്ര ഒളിവിലാണെന്നും ഇയാളെ ഉടന്‍ പിടികൂടുമെന്നും പൊലീസ് അറിയിച്ചു.