ജയലളിതയുടെ മരണം; മൂന്ന്​ മാസം കൊണ്ട്​ അന്വേഷണ റിപ്പോർട്ട്​ സമർപ്പിക്കണം

ചെന്നൈ: തമിഴ്​നാട്​ മുൻ മുഖ്യമന്ത്രി ജയലളിതയുടെ മരണം മൂന്ന്​ മാസം കൊണ്ട്​ അ​ന്വേഷിക്കാൻ സർക്കാർ വിജ്​ഞാപനം പുറപ്പെടുവിച്ചു. തിങ്കളാഴ്​ച മുതൽ മൂന്ന്​ മാസമാണ്​ സർക്കാർ നിയോഗിച്ച ജുഡീഷ്യൽ കമീഷന്​ സമയം അനുവദിച്ചിരിക്കുന്നത്​.

ജയലളിതയെ ആശുപത്രിയിൽ പ്രവേശിപ്പിച്ചത്​ മുതൽ മരിച്ചതുവരെയുള്ള മുഴുവൻ കാര്യങ്ങളും അന്വേഷണ പരിധിയിൽ വരുമെന്ന്​ ഇതുസംബന്ധിച്ച്​ സർക്കാർ പുറപ്പെടുവിച്ച ഉത്തരവിൽ പറയുന്നു. ആശുപത്രിയിൽ ​പ്രവേശിപ്പിക്കാനുണ്ടായ സാഹചര്യം, ആശുപത്രിവാസം, ചികിത്സ, മരണത്തിലേക്ക്​ നയിച്ച സാഹചര്യം എന്നിവയെല്ലാം കമ്മീഷ​ന്‍റെ അ​ന്വേഷണ പരിധിയിൽ ഉൾപ്പെടുത്തിയിട്ടുണ്ട്​.

കമീഷ​​ന്‍റെ അധികാര പരിധികളും സർക്കാർ പ്രത്യേകം നിശ്​ചയിച്ചുനൽകിയിട്ടുണ്ട്​. മദ്രാസ്​ ഹൈക്കോടതി റിട്ട. ജഡ്​ജി അറമുഖ സ്വാമിയെ അ​ന്വേഷണ കമ്മീഷനായി സർക്കാർ നേരത്തെ നിയമിച്ചിരുന്നു. നിശ്​ചിത സമയത്തിനകം മുഴുവൻ വിവരങ്ങളും ​ശേഖരിച്ച്​ പരിശോധിച്ച്​ റിപ്പോർട്ട്​ നൽകൽ കമ്മീഷന്​ വെല്ലുവിളിയാകുമെന്നാണ്​ സൂചന.