കായംകുളത്ത് കെഎസ്ആർടിസി മിന്നൽ സൂപ്പർ ഡീലക്സും ലോറിയും കൂട്ടിയിടിച്ചു; വൻ ദുരന്തം ഒഴിവായി

ഒരാളുടെ നില ഗുരുതരം

ആലപ്പുഴ: കായംകുളം ദേശീയ പാതയിൽ ഒഎൻകെ ജംഗ്ഷനിൽ കെഎസ്ആർടിസി മിന്നൽ സൂപ്പർ ഡീലക്സ് ബസ്സും ലോറിയും കൂട്ടിയിടിച്ച് ഇരുപതോളം പേർക്ക് പരിക്കേറ്റു. നാലു പേരെ വണ്ടാനം മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു. ലോറി ഡ്രൈവറുടെ നില ഗുരുതരമാണ്.

രാവിലെ ആറു മണിയോടെയാണ് സുൽത്താൻ ബത്തേരിയിൽ നിന്ന് തിരുവനന്തപുരത്തേക്ക് പോവുകയായിരുന്ന ബസ് എതിരെ വന്ന ലോറിയുമായി കൂട്ടിയിടിച്ചത്. ബസ് ഡ്രൈവർ സീറ്റിൽ നിന്ന് തെറിച്ചു പോയതിനാൽ നൂറു മീറ്ററോളം ഡ്രൈവറില്ലാതെ ഓടിയ ബസ് പാതയുടെ വശത്തേക്ക് ഇറങ്ങി നിൽക്കുകയായിരുന്നു. രാവിലെ സമയത്ത് ജംഗ്ഷനിൽ വലിയ തിരക്കില്ലാതിരുന്നതിനാൽ വൻ ദുരന്തം ഒഴിവായി.