ചുരമിടിഞ്ഞ് റോഡ് തകര്ന്നു; വയനാട് വഴിയുള്ള കെ.എസ്.ആര്.ടി.സി സര്വീസുകള് നിര്ത്തി
Synopsis
വയനാട് ചുരത്തില് റോഡ് ഇടിഞ്ഞു വയനാട്-കോഴിക്കോട് ചെയിന് സര്വീസുകളും നിര്ത്തലാക്കി
വയനാട്: കനത്ത മഴയില് താമരശ്ശേരി ചുരത്തില് മണ്ണിടിഞ്ഞതിനെ തുടര്ന്ന് ഇതുവഴിയുള്ള കെ.എസ്.ആര്.ടി.സി സര്വീസുകള് നിര്ത്തി വച്ചു. വയനാട്-കോഴിക്കോട് ചെയിന് സര്വീസുകളും ഇനി ഒരറിയിപ്പുണ്ടാകുന്നവരെ നിര്ത്തിയതായി കെ.എസ്.ആര്.ടി.സി അറിയിച്ചു. ചുരം ഒന്നാംവളവിനും ചിപ്പിലിത്തോടിനും ഇടയിലാണ് മണ്ണിടിഞ്ഞിട്ടുള്ളത്. ഇതിന് പുറമെ താഴ്ന്ന പ്രദേശങ്ങളായ ഈങ്ങാപ്പുഴ , കൊടുവള്ളി ഭാഗങ്ങളില് റോഡില് വെള്ളം കയറിയിട്ടുമുണ്ട്.
നിലവില് സുല്ത്താന് ബത്തേരി-വഴി കോഴിക്കോട് ഭാഗത്തു കൂടി കടന്നു പോകുന്ന ദീര്ഘ ദൂര സര്വീസുകള് കല്പ്പറ്റ-പടിഞ്ഞാറത്തറ-തരുവണ-നിരവില്പുഴ-തൊട്ടില്പ്പാലം കുറ്റിയാടി-പേരാമ്പ്ര-അത്തോളി-കോഴിക്കോട് വഴിയായിരിക്കും സര്വീസ് നടത്തുക. സുല്ത്താന് ബത്തേരിയില് നിന്നും താമരശ്ശേരി, പെരിന്തല്മണ്ണ, തൃശൂര് വഴി സര്വീസ് നടത്തിയിരുന്ന മിന്നല് സര്വീസ് ഇനി ഒരു അറിയിപ്പ് ഉണ്ടാകുന്നതു വരെ നാടുകാണി-വഴിക്കടവ്-നിലമ്പൂര്-പെരിന്തല്മണ്ണ-തൃശൂര് വഴിയായിരിക്കും ഓടുക.
സുല്ത്താന് ബത്തേരി വഴി കോഴിക്കോട്, ബാംഗ്ലൂര്, മൈസൂര്, തിരുവനന്തപുരം എന്നിവിടങ്ങളിലേക്കുള്ള മള്ട്ടി ആക്സില് വോള്വോ/സ്കാനിയ ബസുകളും ഇനി ഒരു അറിയിപ്പു ഉണ്ടാകുന്നത് വരെ നിര്ത്തിവെച്ചിട്ടുണ്ട്. എറണാംകുളം-കോഴിക്കോട്-മാനന്തവാടി-ബാംഗ്ലൂര് ഡീലക്സ്, പിറവം-എറണാകുളം-കോഴിക്കോട്-സുല്ത്താന് ബത്തേരി-ബാംഗ്ലൂര് ഡീലക്സ് , മൂന്നാര്-കോഴിക്കോട്-സുല്ത്താന് ബത്തേരി-ബാംഗ്ലൂര് സൂപ്പര് ഡീലക്സ് ബസുകളും അനിശ്ചിതമായി ഓട്ടം നിര്ത്തി.
കോഴിക്കോട് നിന്നും 8.30നുളള കോഴിക്കോട്-സുല്ത്താന് ബത്തേരി-ബാംഗ്ലൂര് മള്ട്ടി ആക്സില് എ.സി വോള്വോ സെമി സ്ലീപ്പര്, 10.30നുള്ള ബാംഗ്ലൂര്-സുല്ത്താന് ബത്തേരി-കോഴിക്കോട് മള്ട്ടി ആക്സില് എ.സി. വോള്വോ സെമി സ്ലീപ്പര് ഒഴികെ മൈസൂര്, ബാംഗ്ലൂര് ഫാസ്റ്റ് പാസഞ്ചര്, സൂപ്പര് ഫാസ്റ്റ്, സൂപ്പര് എക്സ്പ്രസ്, സൂപ്പര് ഡീലക്സ് സര്വീസുകള് മുടക്കമില്ല.
ഇന്ത്യയിലെയും ലോകമെമ്പാടുമുള്ള എല്ലാ Malayalam News അറിയാൻ എപ്പോഴും ഏഷ്യാനെറ്റ് ന്യൂസ് മലയാളം വാർത്തകൾ. Malayalam News Live എന്നിവയുടെ തത്സമയ അപ്ഡേറ്റുകളും ആഴത്തിലുള്ള വിശകലനവും സമഗ്രമായ റിപ്പോർട്ടിംഗും — എല്ലാം ഒരൊറ്റ സ്ഥലത്ത്. ഏത് സമയത്തും, എവിടെയും വിശ്വസനീയമായ വാർത്തകൾ ലഭിക്കാൻ Asianet News Malayalam