ഒടുവിൽ കൊച്ചിയിലെ പ്രധാനമന്ത്രിയുടെ പരിപാടിയിൽ സ്ഥലം എംഎൽഎയ്ക്ക് സീറ്റ് കിട്ടി

മണ്ഡലത്തിലെ പദ്ധതിയുടെ ഉദ്ഘാടനത്തിന് വേദിയിൽ ഇരിപ്പിടം നൽകാതെ തന്നെ അപമാനിക്കുകയാണെന്ന് വി പി സജീന്ദ്രൻ ആരോപിച്ചിരുന്നു. 

കൊച്ചി: കൊച്ചിൻ റിഫൈനറിയിൽ മൂന്ന് പദ്ധതികളുടെ ഉദ്ഘാടനത്തിനായി പ്രധാനമന്ത്രി നരേന്ദ്രമോദി എത്തിയ ചടങ്ങിൽ ഒടുവിൽ സ്ഥലം എംഎൽഎ വി പി സജീന്ദ്രന് ഇരിപ്പിടം. പ്രധാനമന്ത്രി നരേന്ദ്രമോദിക്കും മുഖ്യമന്ത്രി പിണറായി വിജയനും, ഗവർണർ പി സദാശിവത്തിനും കേന്ദ്രമന്ത്രി അൽഫോൺസ് കണ്ണന്താനത്തിനും ഒപ്പം കോൺഗ്രസ് നേതാവ് കെ വി തോമസിനും വേദിയിൽ ഇരിപ്പിടം നൽകിയിരുന്നു. കുന്നത്ത് നാട് എംഎൽഎയായ തന്നെ പ്രോട്ടോക്കോൾ അനുസരിച്ച് വേദിയിലേക്ക് ക്ഷണിക്കേണ്ടിയിരുന്നുവെന്ന് നേരത്തേ സജീന്ദ്രൻ പറഞ്ഞിരുന്നു. എന്നാൽ, പരിപാടിയുടെ ക്ഷണപത്രം മാത്രമാണ് സജീന്ദ്രന് കിട്ടിയത്. 

റിഫൈനറി പദ്ധതി തുടങ്ങിവച്ചത് യുപിഎ സർക്കാരാണെന്നും തന്നെ ഒഴിവാക്കുന്നത് മനഃപൂർവമാണെന്നുമായിരുന്നു സജീന്ദ്രന്‍റെ ആരോപണം.