വിവാദം കത്തിപടർന്നു; മഹാരാഷ്​ട്ര മന്ത്രിയുടെ മകൾ സ്കോളർഷിപ്പ് തിരസ്കരിച്ചു

മുംബൈ: മഹാരാഷ്ട്ര മന്ത്രിയുടെ മകൾ തനിക്ക് ലഭിച്ച സ്കോളർഷിപ്പ് തിരസ്​കരിച്ചു.സാമൂഹിക നീതി മന്ത്രി രാജ്കുമാർ ബദോളയുടെ മകളാണ് അച്​ഛൻ്റെ കീഴിൽ വരുന്ന വകുപ്പി​ൻ്റെ സ്കോളർഷിപ്പ് നിരസിച്ചത്​. താഴ്​ന്ന വരുമാനക്കാരുടെ മക്കൾക്ക്​ നൽകുന്ന സ്കോളർഷിപ്പ്​ സ്വന്തം മകൾക്ക്​ നൽകിയതിൽ  മന്ത്രി വിവാദത്തിലായതിനെ തുടർന്നാണ് ശ്രുതി ബദോൾ സ്വയം വേണ്ടെന്നുവെച്ചത്​.  താൻ മന്ത്രിയുടെ മകൾ ആയതുകൊണ്ടാണ് ഈ സ്കോളർഷിപ്പ് ലഭിച്ചതെന്ന വിമർശനത്തിനെ തുടർന്നാണ് താൻ ഇത് തിരസ്കരിക്കുന്നുവെന്ന് ശ്രുതി ബദോൾ  പറഞ്ഞു.  

പട്ടികജാതി വർഗ വിദ്യാർത്ഥികൾക്ക്  വിദേശത്ത് പോയി പഠിക്കുന്നതിന് 35 സ്കോളർഷിപ്പുകളാണ് സാമൂഹിക നീതി വകുപ്പ്​ നൽകിവരുന്നത്.  താൻ ഒരു മന്ത്രിയുടെ മകളായത് തൻ്റെ തെറ്റാണോ എന്നാണ് മാദ്രാസ് ഐഐടിയിൽ നിന്നും ബിരുദം കഴിഞ്ഞ ശ്രുതി ബദോൾ ചോദിക്കുന്നത്.

പട്ടിക വർഗ വിദ്യാർഥികൾക്കായി നൽകുന്ന സ്​കോളർഷിപ്പാണ്​ മകൾ ശ്രുതി ബദോളിന്​ ഇംഗ്ലണ്ടിലെ മാഞ്ചസ്​റ്റർ സർവകലാശാലയിലെ പി.എച്ച്​.ഡി പഠനത്തിനായി അനുവദിച്ചത്​. വാർഷിക വരുമാനം ആറ്​ ലക്ഷത്തിൽ കുറവായവരുടെ മക്കൾക്കാണ്​ സ്​കോളർഷിപ്പിന്​ അർഹതയുള്ളത്​. സാമൂഹിക നീതി വകുപ്പ്​ സെക്രട്ടറിയുടെ മകനും ഇതേ സ്​കോളർഷിപ്പ്​ നൽകിയിട്ടുണ്ട്​.

മന്ത്രിയുടെ വകുപ്പ്​ തന്നെ മകൾക്ക്​ സ്​കോളർഷിപ്പ്​ നൽകിയതാണ്​ വിവാദം പടരാൻ ഇടയാക്കിയത്​. എന്നാൽ മന്ത്രിയുടെ മകൾക്ക്​ മികച്ച വിദ്യാഭ്യാസ ട്രാക്ക്​ റെ​ക്കോർഡാണ്​ ഉള്ളതെന്നും മെറിറ്റ്​ അടിസ്​ഥാനത്തിലാണ്​ സ്​കോളർഷിപ്പിനായി തെരഞ്ഞെടുത്തതെന്നുമാണ്​ സർക്കാർ വിശദീകരണം. 

മ​​ന്ത്രിയുടെ മകൾക്ക്​ ലോകത്തിലെ 100 മുൻനിര യൂനിവേഴ്​സിറ്റികളിൽ ഒന്നിലാണ്​ പ്രവേശനം നേടിയതെന്നും ഇങ്ങനെയുള്ളവരുടെ കാര്യത്തിൽ വരുമാനം പരിഗണിച്ചിട്ടില്ലെന്നും സർക്കാർ വിശദീകരിക്കുന്നു. താനും വകുപ്പ്​ സെക്രട്ടറിയും സ്​കോളർഷിപ്പ്​ അനുവദിക്കാനുള്ള നടപടികളിൽ നിന്ന്​ വിട്ടുനിന്നതായും ചീഫ്​ സെക്രട്ടിയുടെ നേതൃത്വത്തിലാണ്​ സെലക്ഷൻ നടന്നതെന്നുമാണ്​ മന്ത്രിയുടെ വാദം.

എന്നാൽ മന്ത്രിയുടെ അധികാരദുർവിനിയോഗത്തിനുള്ള തെളിവായാണ്​ പ്രതിപക്ഷമായ കോൺഗ്രസ്​ സംഭവത്തെ കാണുന്നത്​. സംഭവത്തിൽ അന്വേഷണം ആവശ്യപ്പെട്ട്​ അവർ രംഗത്ത്​ വരികയും ചെയ്​തിട്ടുണ്ട്​. മന്ത്രിയുടെ രാജി ആവശ്യപ്പെട്ട്​ എൻ.സി.പിയും രംഗത്ത്​ വന്നിരുന്നു.  മഹാരാഷ്​ട്രയിൽ ദേവേന്ദ്ര ഫഡ്​നാവിസ്​ നേതൃത്വം നൽകുന്ന മന്ത്രിസഭയിൽ നിന്ന്​ നേരത്തെ അധികാര ദുർവിനിയോഗത്തിന്​ ഏക്​നാഥ്​ കദ്​സെ രാജിവെച്ചിരുന്നു.