ട്രംപ് പ്രസിഡന്റാകുന്നതാണ് ഇന്ത്യയ്ക്ക് നല്ലതെന്ന് നട്‌വര്‍സിംഗ്

പ്രധാനമന്ത്രി നരേന്ദ്ര മോദി ഇതുവരെ അമേരിക്കയോടുള്ള നയം കൈകാര്യം ചെയ്ത രീതി തൃപ്തികരമാണെന്നും നട്വര്‍ ദില്ലിയില്‍ ഏഷ്യാനെറ്റ് ന്യൂസിനോടു പറഞ്ഞു.

വിദേശകാര്യമന്ത്രിയായിരുന്ന നട്‌വര്‍ സിംഗ് രണ്ടു തവണയാണ് ഹിലരി ക്‌ളിന്റണുമായി കൂടിക്കാഴ്ച നടത്തിയത്. ഹിലരി ഇന്ത്യയുമായി അത്ര അടുപ്പം കാണിക്കും എന്ന് കരുതാന്‍ നിര്‍വ്വാഹമില്ലെന്ന് നട്‌വര്‍ സിംഗ് ഏഷ്യാനെറ്റ് ന്യൂസിനോടു പറഞ്ഞു.

അമേരിക്ക പുറത്തു വിട്ട ഭക്ഷണത്തിനു പകരം എണ്ണ കുംഭകോണത്തെ തുടര്‍ന്ന് രാജിവച്ച നട്‌വര്‍ അമേരിക്കന്‍ നയത്തിന്റെ കയ്പ് വ്യക്തിപരമായി അനുഭവിച്ചതാണ്. ആരു പ്രസിഡന്റായാലും ഇന്ത്യ സ്വന്തം കാലില്‍ നിന്നു കൊണ്ടുള്ള ബന്ധം സ്ഥാപിക്കണം. അമേരിക്കയോടുള്ള സമീപനം ഉള്‍പ്പടെ നരേന്ദ്ര മോദിയുടെ നയം തൃപ്തികരമാണെന്നും നട്‌വര്‍ പറഞ്ഞു.

അമേരിക്കന്‍ നയരൂപീകരണത്തിന്റെ സംവിധാനം ശക്തമാണെന്നിരിക്കെ ട്രംപ് പ്രചരണ രംഗത്ത് പറയുന്ന പല കാര്യങ്ങളും പ്രസിഡന്റായാല്‍ മറക്കേണ്ടി വരുമെന്നും നട്‌വര്‍ അഭിപ്രായപ്പെടുന്നു.