യു. എൻ ഉപരോധം: യുദ്ധപ്രഖ്യാപനമെന്ന്​ ഉത്തരകൊറിയ

പ്യോങ്​യാങ്​: യു.എൻ ഉപരോധത്തിനെതിരെ ശക്​തമായ മറുപടിയുമായി ഉത്തരകൊറിയ. യു.എന്നി​ന്‍റെ നടപടി യുദ്ധപ്രഖ്യാപനമാണെന്ന്​​ ഉത്തരകൊറിയ അഭിപ്രായപ്പെട്ടു​. രാജ്യത്തി​ന്‍റെ ഒൗദ്യോഗിക വാർത്ത എജൻസിയാണ്​ ഇതുസംബന്ധിച്ച വിദേശകാര്യ മന്ത്രാലയത്തി​​ന്‍റെ പ്രസ്​താവന റിപ്പോർട്ട്​ ചെയ്​തിരിക്കുന്നത്​​. 

ആണവശക്​തിയാവാനുള്ള ഉത്തരകൊറിയയുടെ ചരിത്രദൗത്യം അമേരിക്കയെ ഭയചകിതരാക്കുന്നു. ഇതാണ്​ പുതിയ ഉപരോധങ്ങൾ രാജ്യത്തിന് മേൽ അടിച്ചേൽപ്പിക്കാൻ കാരണം.  ഇതുകൊണ്ട്​ തങ്ങൾ പിൻമാറില്ലെന്നും സ്വയരക്ഷക്കുളള ആണവപരീക്ഷണങ്ങള്‍ തുടരുമെന്നും ഉത്തരകൊറിയ വ്യക്തമാക്കി.

ഉത്തര കൊറിയയുടെ എണ്ണ ഇറക്കുമതിയുള്‍പ്പെടെ നിയന്ത്രിക്കുന്നതടക്കമുളള നിര്‍ദേശങ്ങളടങ്ങിയ അമേരിക്കന്‍ പ്രമേയമാണ് യുഎന്‍ രക്ഷാസമിതി പാസാക്കിയത്. ഉത്തരകൊറിയയുമായി വ്യാപാരബന്ധം പുലര്‍ത്തുന്ന ചൈനയും റഷ്യയും പ്രമേയത്തിന് അനുകൂലമായാണ് വോട്ട് ചെയ്തത്.