'ഇത് കന്യാസ്ത്രീമാരുടെ കണ്ണീരിന്റെ വിജയം'

'പാവപ്പെട്ട കന്യാസ്ത്രീമാര്‍ നീതിക്ക് വേണ്ടി ഒടുവില്‍ തെരുവിലിറങ്ങേണ്ടി വന്നു. ഈ സമരപ്പന്തലില്‍ അവരോടൊപ്പം ക്രിസ്തുദേവന്‍ തന്നെയാണ് ഉണ്ടായിരുന്നത്. പരമകാരുണികനായ ദൈവത്തിന് നന്ദി പറയുകയാണ്'  

കൊച്ചി: കന്യാസ്ത്രീയുടെ ബലാത്സംഗ പരാതിയില്‍ മുന്‍ ജലന്ധര്‍ ബിഷപ്പ് ഫ്രാങ്കോ മുളയ്ക്കല്‍ അറസ്റ്റിലായതോടെ കൊച്ചിയില്‍ കന്യാസ്ത്രീമാര്‍ നടത്തിയ സമരം വിജയം കണ്ടിരിക്കുകയാണ്. 'കന്യാസ്ത്രീമാരുടെ കണ്ണീരിന്റെ വിജയം' എന്നാണ് അറസ്റ്റിനെ സമരസമിതി വിശേഷിപ്പിച്ചത്. 

'പാവപ്പെട്ട കന്യാസ്ത്രീമാര്‍ നീതിക്ക് വേണ്ടി ഒടുവില്‍ തെരുവിലിറങ്ങേണ്ടി വന്നു. ഈ സമരപ്പന്തലില്‍ അവരോടൊപ്പം ക്രിസ്തുദേവന്‍ തന്നെയാണ് ഉണ്ടായിരുന്നത്. പരമകാരുണികനായ ദൈവത്തിന് നന്ദി പറയുകയാണ്. അതോടൊപ്പം തന്നെ ഇത് ക്രിസ്തീയ വിശ്വാസികള്‍ മാത്രമല്ല, കേരള സമൂഹം ഒന്നാകെ ഏറ്റെടുത്ത സമരമാണ്, കേരളത്തില്‍ നീതിബോധം നശിക്കാത്ത ജനങ്ങള്‍ ഉണ്ട് എന്നതിന്റെ പ്രതികരണമാണ് ഈ അറസ്റ്റ്. ഇതിനെ പൂര്‍ണ്ണമായ ഒരു വിജയമായി പ്രഖ്യാപിക്കാന്‍ ഞാനാഗ്രഹിക്കുന്നില്ല, ആദ്യത്തെ പടി മാത്രമേ കയറിയിട്ടുള്ളൂ, ഇനിയും പടികള്‍ കയറാനുണ്ട്. അതുകൊണ്ട് സമരസമിതി ഈ അറസ്റ്റോടുകൂടി സമരം നിര്‍ത്തിപ്പോകുമെന്നില്ല, കന്യാസ്ത്രീ അമ്മമാര്‍ക്ക് നീതി നടപ്പാക്കും വരെ സമരം തുടരും'- സമരസമിതി പ്രതിനിധി ഇന്ദുലേഖ പ്രതികരിച്ചു.